Dili, 29 Maiu 2019 – Conselho de Imprensa (CI) no ajénsia ONU nian, the United Nations Development Programme (UNDP) iha 29 Maiu 2019 ofisialmente entrega sertifikadu ba jornalista formadu hamutuk na’in 25. Jornalista formadu hirak ne’e tuir ona formasaun durante fulan tolu ne’ebé hahú iha inísiu Marsu no remata iha semana ikus Maiu tinan ne’e.

Formasaun jornalístiku ne’ebé hanaran treinamentu jornalizmu kompriensienviu ne’e kobre modul ka matéria lubuk-ida mak hanesan, étika jornalizmu, oinsa dezenvolve istória, tekniku entrevista, padraun lingua Tetum, gender senstive reporting, data journalism, photo journalism, utilizasaun mídia sosiál, vidio journalism, TOR kobertura nian, rádiu komunidade,onsite visit no news room.

Tuir treinadór husi Projeitu Eleitorál UNDP, Yuichi Ishida, treinamentu journalizmu kompriensivu ne’e realiza atu hametin jornalista foun no estudante sira komunikasaun sosiál sira nian abilidade iha area jornalizmu, liuliu atu ajuda fasilita partisipante atu kompriende no tau iha pratika matéria hotuhotu ne’ebé sira hetan durante prosesu formasaun refere.

Sr. Yuichi haktuir treinamentu journalizmu kompriensivu ne’e konta ba datoluk ona, iha-ne’ebé faze priméiru no segundu hala’o iha 2018 no tinan ne’e alarga ona mós ba munisípiu sira, hanesan parte Leste nian, konsentra iha Baucau, parte súl nian realiza iha Maubisse no parte oeste nian hala’iha liquisa.

Totál partisipante sira ne’ebé hetan ona sertifikadu hosi treinamentu jornalizmu kompriensivu ne’e mak 162 no fasilitadór ka treinadór sira mai hosi CI, UNDP no treindór parseiru internasionál sira hanesan Australia, SEAPA (Southeast Asia Press Alliance) no Indonézia.

Programa ka atividade treinamentu jornalizmu kompriensivu ne’e nu’udar rezultadu ida husi kooperasaun entre CI no Projeitu Eleitorál UNDP durante ne’e. Kooperasaun ne’e inísia iha 2017, hahú ho treinamentu jornalizmu dahaluk ne’ebé foka-liu ba reportajen eleitorál ne’ebé hetan apoiu finanseiru husi Povu Japaun.

Ba informasaun detáilu, halo-favór kontakta CI nia pesoál sira ekipa DDAM – CI tuir mai ne’e:                                  

1. Alberico da Costa Junior; telefone: 77254078
2. Caetano Alves: telefone 77338969

 

 

Instabilidade polítika railaran ne’ebé la’o ona kuaze tinan rua nia laran, afeita maka’as ba prosesu dezenvolvimentu país nian iha setór hotu-hotu. Situasaun ne’e implika mós prosesu hametin transparansia, kontabilidade no boa governasaun ne’ebé kontribui ba prosesu hametin sistema demokrasia iha país ne’e. Mudansa lala’ok polítika iha railaran husi governu ida ba governu seluk mós fó imapktu ba dezenvolvimentu mídia iha nasaun foun ne’e. Ho ida-ne’e, sidadaun sira la goja sira nia direitu liberdade ba flutu informasaun (free flow of information) hodi hetan informasun ida-ne’e sufisiente no kredivel. Polítika Governu nian hodi halo mudansa ba estrutura RTTL E.P. liuhusi apontamentu polítika hamosu dikótomia no ambiente la hakmatek ba jornalista sira hodi hala’o sira nia atividade jornalistika ho di’ak hanesan baibain.

 

 

Impase polítika dadauk ne’e la’os afeita deit ba dezenvilvomentu ekónomiku país nian, maibé afeita dadauk ona liberdade imprensa no liberdade espresaun iha railaran. Politizasaun ba instituisaun mídia públiku nu’udar forma estratéjia pólitika ida atuhodi interven polítika redasaun RTTL E.P. no Ajénsia Tatoli nian. Pesoál balu Instituisaun Estadu no Governu nian hahú ameasa no bandu jornalista sira atu labele espresa sira nia hanoin no pensamentu kona-ba asuntu sira ne’ebé relasiona ho interese públiku nian iha plataforma sira mídia sosiál. Ameasa ne’ebé Xefe Gabinete, Sekertáriu Estadu Komunikasaun Sosiál (SEKOMS), halo hasoru Jornalista RTTL E.P. Constancio Vieria iha loron 11 Janeiru2019 nu’udar hahalok ditadura ne’ebé la afavor ba prinsipiu liberdade imprensa no liberdade espresaun iha nasaun demokrátiku ida-ne’e. Xefe gabinete ne’e ameasa atu hasai Jornalista Constancio Vieira husi nia knaar nu’udar jornalista RTTL E.P.