Se mak ami

Membru Conselho de Imprensa de Timor-Leste

2021-2025

 

Otelio Ote koñesidu ho naran Ote, moris iha área Nonkikan, Rejiaun Espesiál Oe-cusse, iha loron 31 fulan Dezembru tinan 1969. Akaba nia eskola primária iha SDN Oe-Silo, Oe-cusse iha tinan 1981, kuntinua Pre-sekundária iha SMPN Pante-Makasar Oe-cusse to’o tinan 1980. Iha nível Sekundária, Otelio Ote, eskola durante tinan tolu iha Eskola Sekundária Públiku Díli (SMAN 1 Dili) no remata iha tinan 1987 no akaba ninia kursu iha insinu supriór Universidade Timor-Timur – UNTIM, iha tinan 1992.

Otelio Ote hahú ninia kna’ar iha mundu journalízmu liu iha jornál semanál Suara Timor-Timur (STT) iha tinan 1988-1999, liu tiha tinan ida loloos iha tinan 1989 to’o tinan 1992 nia asume kna’ar nu’udar jornalista iha Revista Caritas Universidade Timor-Timur (UNTIM).  Tinan 1992 -1999  Otelio Ote mós servisu iha Diáriu Suara Timor Timur (STT), Diáriu Media Indonézia. Hafoin kuntinua servisu nu’udar jornalista iha Televizaun RCTI-SCTV iha tinan 1993 to’o 1994. Iha tinan 1993 to’o 1999 asume mós kna’ar jornalista iha Televizaun RCTI. Hafoin sai nu’udar kontributór ba Assosiated Press (AP) TV 1998 to’o 1999. Iha tinan 1999, Ote mós asume kna’ar nu’udar kontributór ba TV NHK husi Japaun.

Hafoin Timor-Leste independénsia, iha tinan 2000 ate 2004, Otelio Ote, hala’o kna’ar nu’udar Jornalista / Editór / Wakil Pemred iha Diáriu Timor Post nomós asume kna’ar nu’udar koordenadór ba Sentru Treinamentu Jornalizmu Diáriu Timor Post.

Iha tinan 2002-2009, Ote asume kargu nu’udar editór iha jornál Lifaun Post, Tabloid TQ. Tabloid Bola. Enkuantu iha tinan 2004 to’o tinan 2009, Otelio Ote, asume kna’ar hanesan Xefe Redasaun iha Revista Lafaek no Jornál Labarik. Hafoin iha tinan 2011 to’o 2013 asume kna’ar hanesan Diretór no Xefe Redasaun iha Diariu Timor Post no editór iha online www.artistimor.com.

Iha mundu organizasaun journalízmu, Prezidente Conselho de Imprensa ne’e asume mós kna’ar nu’udar Koordenadór Asosiasaun Jornalista Timor-Leste, iha tinan 1999-2001. Tinan 2001 - 2010 asume kna’ar Prezidente Sindikatu Jornalista Timor-Leste. Otelio Ote hetan konfiansa hodi asume pasta nu’udar Koordenadór Komisaun Lejislasaun Komunikasaun Sosiál. Enkuantu iha tinan 2011-2014 envolve nu’udar membru iha Tim 5 ba draft Lei Mídia ne’ebé organiza hosi Sekretáriu Estadu Komunikasaun Sosiál.

Iha loron 16 fulan Setembru tinan 2020, Otelio Ote, eleitu nu’udar reprezentante órgaun komunikasaun sosiál mai iha Conselho de Imprensa ba períodu 2021-2025. Membru Conselho de Imprensa ne’e aktualmente asume mós kna’ar nu’udar tekniku profesionál iha Kompania Timor Post no Responsável ba kanál Youtube (Online) Timor Post.

Iha loron 23 fevereiru 2023, simu posse husi Prezidente Parlamentu Nasional hodi asumi kargu nu’udar Prezidente Conselho de Imprensa ba restante mandatu tinan 2023-2025.



Benevides Correia Barros, nu’udar membru Conselho de Imprensa de Timor-Lestene’ebe hetan tomada de posse iha Parlamentu Nacional (PN) iha loron 10 Fevereiru 2021-2025.

Benevides Correia Barros, oan hosi Silvino Amaral ou Lelobau (naran jentiu) no Luisa Bernardo (Heli Meta (naran jentiu) ho maun alin no feton hamutuk 12. Benevides moris iha Bairo Paslete, Suku Manapa, Postu Administrativu Maliana, Munisípiu Bobonaro, iha loron 16 fulan Marsu, tinan 1968. Depois iha tinan 1974, ho idade tinan neen, hahú tama eskola pre-premária iha Colegio Infantre Sagre Maliana to’o militár Indonesia okupa Batugade no Maliana iha tinan 1975.

 Iha tempu invazaun Militár Indonesia, Benevides ne’ebé nu’udar subriñu hosi eis Vise Ministru Defeza RDTL Manuel Soares “Askoli” ne’ebé militár Indonesia tiru mate iha Natarbora iha tinan 1979 ne’e ho família halai hosi Paslete (Colegio Infantre Sagre Maliana) área Poerema ne’ebé lokaliza iha foho Leolaco nia sorin. Subar iha Poerema durante fulan neen (6). Hosi Poerema, depois halai ba Talo no subar iha fatin refere durante tinan ida.

Freelance journalist ba ABC, BBC no AFP iha tinan 1998 to’o 1999 ne'e, remata ninia estudu iha eskola Ensino Primario iha Munisípiu Ainaro iha tinan 1983, remata eskola Ensino Pre-Sekundária iha Munisípiu Ainaro tinan 1986 no kompleta nia estudu iha nível eskola Sekundária iha Munisípiu Díli iha tinan 1989. Hafoin kontinua nia estudu iha kursu Direitu iha Universidade Kristen Satya Wacana, Salatiga, Java Sentral, Indonesia ne’ebé graduadu iha loron 22 Setembro 1999 iha área Direitu.

Atu aumenta ninia koñesimentu ko’alia lian inglesh, Benevides Correia Barros, tuir kursu lian Ingles iha Universidade New South Wales, Sydney, Australia durante fulan tolu (3) Outubru to’o Dezembru tinan 2000 to’o simu Sertifikadu. Hosi oportunidade ne’e iha fulan Dezembru tinan 2000 hetan bulsu estudu husi Universidade New South Wales, Sydney, Australia; ne’ebé hahú fulan Janeiro tinan 2001, Benevides hahú kursu mesteradu iha área Direitu Internasionál iha Universidade New South Wales, Sydney, espesifiku liu iha Direitu Internasionál kona-ba tasi (International law of the Sea), maibé eskola ne’e dura fulan neen (6) de’it no la konsege ramata kursu refere tanba ezizensa tenki fila hodi halo pratika nu’udar advogadu iha Timor-Leste. 

Partisipasaun Iha Programa Treinamentu

Inisiu 1991 partisipa iha programa treinamentu báziku lideransa (basic leadership training program) no análiza impaktu sosiál durante semana rua (2) iha Universidade Kirsten Satya Wacana Salatiga, Java Central, Indonesia; Depois iha fulan Agostu 1991 halo servisu sosiál hamutuk ho komunidade iha Pastu Administrativu Maubara, Munisípiu Liquiça durante fulan ida. Nia mós nu’adar autór ba programa ne’e maka LPM (Lembaga Pemberdayaan Masyarakat) Universidade Kristen Satya Wacana hala’o. Iha tinan 1993 partisipa iha treinamentu lideransa no análiza impaktu sosiál no treinamentu kona-ba oinsá hakerek proposál inklui partisipa iha seminár nasionál no internasionál sira hanesan iha tinan 1995 nomeia ba partisipa iha Seminár Nasionál iha Bandung ho tópiku prinsipál kona-ba “what was the Impact of Integration Timor-Leste into the Republic of Indonesia” (Impktu Saída Maka Hetan Husi Integrasaun Timor-Leste ba Repúblika Indonesia) no hetan Sertifikadu Partisipante. Iha fulan Agustu tinan 2001 nu’udar koordinadór ba ekipa advogadu privadu husi Timor-Leste, Benevides Correia Barros, hetan konfiansa hodi partisipa iha Community Legal Center Conference iha Perth, Australia no halo estudu komparativu ba Community Legal Center and Legal Aid officeinklui esperiénsia sira seluk to’o tinan 2007.

Envolvimentu Iha Prosesu Libertasaun Nasionál

Iha fulan Setembru 1991 nu’udar militante juradu RENETIL (Resistencia Nacional dos Estudantes de Timor-Leste) ne’ebé iha loron 19 Novembru 1991 ho estudante Timorona hamutuk na’in hitu nulu resin haat (74) halo manisfestasaun iha Jakarta, Indonesia hodi protesta kona-ba masakre Santa Crus, Dili. Rezultadu husi protesta ne’e, autoridade Indonesia kaer no kastigu iha Polda Metro Jaya Jakarta durante fulan lima (5) sein julgamentu. Depois hetan liberdade kondisionál iha fulan Abril 1992 ho rekizitu tenki apresenta-án periodikamente ba autoridade militár no proibidu sai husi sidade ne’ebé hela ba sein koñesimentu husi autoridade militár (tahanan kota). Loron 10 Setembru 1993 Koramil Postu Administrativu Cailaco kapturadu iha Bairo Mautalo, Cailaco, depois tortura no kastigu iha Kondim Maliana durante semana ida (1), no transfere mai Dili kastigu iha SGI (Satuan Tugas Intelejen) Colmera, Dili husi 17 Setembru to’o 1 Dezembru 1993 no hetan liberdade kondisionál ho rekizitu tenki apresenta-án periodikamente ba autoridade militár iha sidade ne’ebé hela ba to’o 30 Agostu 1999 Konsulta Popular (referendu). Aleinde ne’e, iha mós esperiénsia lubuk ida mak Benevides Correia Barros, halo inklui Servisu besik Prezidente CNRT no Komandante em Xefe FALINTIL Kay Rala Xanana Gusmão tantu durante kastigu iha prizaun Cipinang no muda prizaun domisiliáriu iha Salemba, Jakarta.

Benevides Correia Barros, mós nomeia nu’udar koordenadór ba asuntu professional skills iha Organizasaun Estudante Timorense (IMPETTU-Salatiga) Indonesia iha tinan 1994. Benevides mós iha esperiénsia nu’udar freelance journalist ba ABC, BBC and AFP. Durante períodu ida ne’e ativu informa ba media refere no embaixada Europeia iha Jakarta kona-ba violasaun direitu umanu iha Timor-Leste. Nia mós iha esperiénsia hakerek opiniaun iha Jornál Suara Timor-Timur iha tinan 1996 to’o 1997 nomós iha tinan 2000 hakerek opiniaun iha Suara Timor Lorosa’e (STL). Benevides Barros Coreia mós iha espriénsia lubuk ida servisu iha Misaun Onu nian Affairs UNTAET {United Nation Transitional on East Timor} inklui servisu nu’udar tradutór (interpreter) ba INTERFET {International Force for East Timor}.

Okupasaun Profesionál Atuál

Hosi esperiénsia lubuk ida iha pasadu lori Benevides Barros Coreia aktualmente asume kna’ar nu’udar péritus ba lei iha Conselho de Imprensa ne’ebé nomeia hosi Parlamentu Nasionál no ofisialmente simu pose hosi Prezidente Parlamentu Nasionál Aniceto Guterres iha loron 10 Fevereiru 2021. Nia mós asume hela kna’ar hanesan Membru AATL, Asesór iha CLN nomós kontinua nafatin fó asisténsia no advokasia jurídika gratuita ba empreza ka komunidade. 

 

Isabel M. F. de Jesus, moris iha Uaturau de Cima, Suku Wailili, Postu Administrativu Baucau, Munisípiu Baucau, loron 11 fulan Novembru 1987, oan da-7 husi maun alin na’in 9 husi Aman Sergio de Jesus, (matebian) no inan Francisca Maria Fernandes.

Konsilleira Isabel Fernandes nomeia no simu pose husi Parlamentu Nasionál iha loron 21 Setembru 2023, nu’udar reprezentante Parlamentu Nasionál nian ne’ebé péritu iha área komunikasaun sosiál hodi substitui Expedito Loro Dias Ximenes ba restante mandatu tinan 2023-2025.

Agora dadaun nu’udar membru organizasaun jornalista Asosiasaun Jornalista Timor Lorosa'e (AJTL). Iha marsu 2023 to’o agora nu’udar Koordenadora ba departamentu Komersial iha GMN-TV.  Antes ne’e, asume mós responsável hanesan Kordenadora ba departamentu Produsaun no Programasaun iha GMN-TV, Diretora ba departamentu Produsaun no Programasaun iha GMN-TV no diretora ba departamentu Informasaun GMN-TV.

Iha tinan 2014 – 2016 nudar Jornalista no apresentadora iha Rádiu Timor-Leste (RTL) no iha tempu hanesan nu'udar mós dosente part time ba departamentu Komunikasaun Sosiál iha Universidade Oriental Timor Lorosa'e (UNITAL). Hala’o mós nu’udar Media Officer iha Ministeriu Planeamentu no Investimentu-MPIE durante tinan rua (2016-2027).

Hahú estudu Primária, iha Eskola Primaria Wailili iha Postu Administrativu Baucau Vila, husi primeiro to’o quinto ano. Kontinua fali nia estudu primária to’o remata iha eskola primária Katólika Fatumaka, iha tinan 2000. Remata estudu pre sekundária iha Colégio Fatumaka iha tinan 2003. Estudu sekundária iha Colégio São Jose Balide, Dili no iha tinan 2006. Iha tinan 2007, kontinua estudu iha Fakuldade Siénsia Polítika iha Universitas Katolik Widya Mandira-UNIKA Kupang tinan 1 no kontinua estudu iha Sekolah Tinggi Ilmu Komunikasi -STIKOM Bandung-Indonesia, iha tinan 2008 no gradua iha tinan 2012.

Iha agostu 2016, frekuenta formasaun Multimedia Training Course For Pacific Countries iha (MMTCI) Jogjakarta-Indoensia. Tuir mós House Training Course for Newscasting, Anchor and Newsreader Dili, no iha tinan 2015 partisipa mós workshop of TV.


Francisco Belo Simões da Costa, nu’udar membru Conselho de Imprensa de Timor-Leste, ne’ebe hetan tomada de posse husi Prezidente Parlamentu Nacional (PN) Vicente da Silva Guterres iha loron 10 Maio 2016. Nia eleitu husi organizasaun jornalista, Timor Leste Press Union (TLPU), mandatu 2016-2020. 

Quito Simões, naran familiar ho kolega jornalista sira, re-eleitu nu’udar membro Conselho de Imprensa husi Organizasaun Jornalista Timor Leste Press Union (TLPU) ba segundu mandatu tinan 2021-2025.

Quito Simões nu’udar Timoroan dahuluk ne’ebé simu prémiu kampiaun ba Antí-Korupsaun husi Estadus Unidus Amérika bainhira partisipa programa IVLP ne’ebé prestijiozu no simu prêmiu 2023 nian direta husi EUA nia Ministru Negósiu Estranjeiru, Antony Blinken.

Oras ne’e dadaun, Konsilleiru Francisco Belo hala’o kna’ar profesionál iha mundu jornalízmu iha mahon mídia online hatutan.com nu’udar Xefe Redasaun. Antes ne’e, Konselleiru Francisco hala’o mós kna’ar jornalízmu iha mídia estatál Ajénsia Notisioza Tatoli.IP nu’udar editór.

Quito Simões hahú loloos nia kareira iha mundu jornalízmu iha Jornál Suara Timor Lorosa’e (STL). Ho dedikasaun servisu no koñesimentu naton iha área jornalízmu nian, iha tinan klaran 2007, dirijentis no na’in ba STL Media Group nomeia Quito Simões asume responsabilidade nu'udar Editór Ezekutivu (Managing Editor) to’o tinan 2010. 

Tinan 2011, Quito Simões, husik hela nia servisu iha STL Media Group hodi ba hakna’ar fali atividades jornalízmu nian iha GMN. Kareira jornalízmu iha GMN, Quito Simões hala’o kna’ar hanesan Jornalista, editór no ikus liu okupa pozisaun nu’udar Koordenador cobertura (GMN/Jornal Nacional Diario ho Jornal Nacional Semanario).

Entre tinan 2004, Quito Simões, tuir kursu jornalista báziku nian iha Lembaga Pers Dr. Soetomo (LPDS), Jakarta-Indonesia no aproveita oportunidade iha Jakarta, nia mós halo estájiu (magang) iha Jornál Nasionál KOMPAS.   

Iha fali tinan 2007, Quito Simões, kontinua hikas nia kursu jornalízmu intensivu iha LPDS Jakarta. Hafoin ne’e, nia ba kontinua nia estajiu (magang) iha jornal TEMPO no halo mós estudu komparativu iha televizaun privadu TRANS-TV iha Jakarta. 

Liu husi kongresu nasionál asosiasaun jornalista sira nian, Timor Leste Press Union (TLPU), iha loron 30 Abril 2016, Quito Simões hetan fiar hodi asumi kna’ar nu’udar Prezidente TLPU ba períodu 2016-2020. 



Amito Qonusere Araujo
moris iha Aldeia Chai, Suku Loré I, postu Administrativu Lospalos. Qonusere mai hosi naran Kultura nian. Oan-husi Moises Evaristo no Alcina Valente, iha maun-alin naín-6 (Mane-3 no feto-1), no naín-2 (Feto-1 no mane-1) fila hikas ba Aman Maromak nia kadunan Santo.

Amito Qonusere Araújo ramata nia Eskola Sekundária Nino Conis Santana Lospalos iha tinan 2010. Kontinua iha Universidade da Paz (UNPAZ) iha Fakuldade Siénsia Sosiál no Humaniora iha Departamentu Relasaun Internasionál (agora livre teória). Nia manan ona esperiénsia barak iha mundu jornalizmu tanba durante tinan-15 nia laran haknaar an iha mídia lokál no nasionál, inklui hakerek informasaun rai-laran ba mídia internasionál balun. Esperiénsia hirak ne’e nia halibur hahú sai hanesan jornalista hodi servisu iha Rádiu Komunidade Lospalos (RCL) “Vox Populy”. Iha fatin ne’e, nia assume knar hanesan jornalista no aprezentadór (2007-2010).

Tanba hakarak hetan esperiénsia iha mídia emprime, iha fulan-Novembro 2010 toó Jullu 2011, nia koko esperiénsia foun iha mídia emprime “Diáriu Timor Post” ho lema “Harii Unidade, Justisa no Demokrásia”. Iha tinan hanesan, iha Jullu-Novembro 2011, nia nu’udar Xefe Programa no Editór iha Rádio Akadémiku Universidade da Paz (UNPAZ).

Iha 2016, Qonusere hamutuk ho jornalista senior sira seluk, nu’udar fundadór hodi harii Sentru Mídia Investigativu (SMI), ne’ebé fasilita formasaun jornalizmu rádio ba kandidatu jornalista foun sira. Tanba iha esperiénsia wa’in, iha tinan 2015, nia sai hanesan formadór ba kandidatu Jornalista foun sira iha Sentru DESK.

Hosi Novembru 2011 to’o 2022, nia servisu iha Rádio Televizaun Timor Leste, Empreza Públika (RTTL, E.P) hodi responsabiliza ba Programa Debate Semanál Rádio, TV no Programa Divertimentu iha Rádio no TV RTTL, E.P. Antes ne’e, iha 2018-2020, nia assume kargu hanesan Xefe Departamentu Informasaun Planu no Ajenda RTTL, E.P no Editór Notísia Rádiu.

Maske nia okupadu hala’o ninia servisu hirak ne’e. maibé nia sei buka tempu livre hodi espresa ninia hanoin liuhosi hakerek artigu sosiál-polítika no artigu kona-ba Liberdade Imprensa no Liberdade Espresaun, ne’ebé públika ona iha mídia Eletrónika no mídia emprime iha Timor-Leste.

Iha ninia kareira jornalístiku, Qonusere kontribui hodi hakerek notísia ba mídia Online rai-li’ur inklui mídia BBC Indonézia. Aleinde ne’e, nia kontribui mós informasaun kona-ba polítika rai-laran tuir perspetiva jornalista nian ba Mídia Negosiu HIS London.Liuhosi dedikasaun no kontribuisaun servisu iha mídia, nia la’ós buka hatene de’it oinsá halibur no hakerek notísia regulár (kumpre elementu notísia 5W + 1H), maibé nia utiliza oportunidade ho másimu hodi aprende no aprende nafatin hodi hala’o prátika liuhosi atividade jornalizmu loro-loron.

Hosi ninia dedikasaun iha mundu jornalizmu liu-liu hanesan jornalista ba rádiu, liuhosi ninia esforsu rasik, to’o ikus nia hetan rekuñesimentu hosi Asosiasaun Jornalista Timor Lorosa’e (AJTL) ba kategoria “Hakerek Feature Rádio di’ak Liu” iha AJTL Award tinan 2015.

Amito Qonusere Araújo nafatin hala’o ninia atividade jornalizmu hanesan jornalista ida no sai hanesan editór notísia ba TV-RTTL, Aprezentadór Notísia Rádio no sai Entervistádor iha RTTL, E.P. Oras ne’e dadauk, Amito hanesan Editór no Entrevistádor iha Rádio Televizaun G-News. Amito forma ona família Barlakeadu ho Alexandrinha Lopes, iha oan na’in rua mak hanesan Calildorjan Fayqun Lopes Araújo no António El-Sereno Calik de La Corte Araújo,Iha loron 27 Janeiru 2023, liuhusi konferénsia AJTL, jornalista sira depozita konfiansa hodi asumi responsabilidade hanesan membru konselleiru, no iha loron 23 Fevereiru 2023, simu tomada de posse husi parlamentu nasional ba restante mandatu tinan 2023-2025.




2021-2023
2021-2022
2016-2021

Sekretariadu

Diretór Ezekutivu
Antonio Dias

Antonio Dias

2020-2023
2016 - 2020
Joao Paulo

João P. H. L. da Costa

Fiskál Úniku
Diretur DAFAL

Ermenjildo da Costa

Diretór Diresaun Servisu Koorporativu
Funsionáriu
  • Adelina L. I. Duarte
  • Almerio D. J. Barros
  • Dulce T. da Costa
  • Agostinho da S. Soares
  • Georzinho A. Fernandes
  • Manuel A. G. da Silva
  • David D. Goncalves
  • Liliosa Amaral
  • Domingas do Rego
  • Jose D. C. D. J. de Almeida
  • Zito C. Junior
  • Alicia L. R. Alberto
  • Joaquim S. da Silva
  • Juvinal C. de C. Guterres
  • Carmelita Pereira
  • Emiliana de Araujo
Antonio Dias
Antonio Dias
Diretór Diresaun Rekursu Humanu
2016-2020
Funsionáriu
  • Aniceto dos Santos
  • Rosalina P. da Rocha
  • Adelina A. Gusmão
Zenilton Zeneves
Zenilton Zeneves
Diretór Diresaun Apoiu Jurídiku no Supervizaun
2017-2020
Funsionáriu
  • Antonito dos R. Baptista
  • Francisco B. Cunha
  • Octavia Pereira
Diretur DAFAL

Altino D. C. Freitas

Diretór Diresaun Relasaun Institusionál no Informasaun
Funsionáriu
  • Elisio Pinto Guterres Soares
  • Angelina Gusmão
  • Santino Dare Matias
  • Estanislau Lourdes
  • Elizita Pinto
  • Efrem Duarte Guterres
  • Prezaldo Almeida
  • Armindo de Jesus
Diretur DDAM

Alberico D. C. Junior

Diretór Diresaun Análiza no Dezenvolvimentu Mídia
Funsionáriu
  • Caetano Alves
  • Lazaro Ximenes
  • Julieta X. Sequeira
  • Maria Bibel
  • Francisco Jose de Almeida
  • Geremias Martins Salsinha 
  • Zelite Marques Freitas