Dili, 11 Maiu 2020 – Conselho de Imprensa Timor-Leste (CI) no UNDP Timor-Leste, husu ba jornalista no meu komunikasaun hotu-hotu ne’ebé eziste iha país ne’e atu kumpre Matadalan Kobertura ba COVID – 19 bainhira halo kobertura ba asuntu pandémia virus korona ne’ebé dadauk ne’e sai ameasa ba vida umanu iha mundu.
Prezidente CI, Virgílio da Silva Guterres hato’o pedidu ne’e durante konferénsia imprensa relasiona ho lansamentu Matadalan Reportajen ba COVID – 19 Segunda-Feira (11/5) iha Edifísiu CI nian, Quintal-Boot – Dili.
Tuir nia, Matadalan ne’e nu’udar regra moral no konduta hahalok nian ba jornalista no meu komunikasaun sira atu la’o-tuir bainhira hala’o atividade jornalístika no halo publikasaun notísia kona-ba asuntu COVID – 19.
“Matadalan Reportajen ba COVID – 19 foti valor no prinsípiu sira ne’ebé Kódigu Étika Jornalístika opta. Pur ezemplu, notísia tenke cover both sides no jornalista tenke halo verifikasaun ba informasaun hotu-hotu no nia fonte sira antes publika,” nia haktuir.
Prezidente CI ne’e mós husu ba jornalista no meu komunikasaun hotu-hotu atu hala’o ninia papél informativu no edukativu ho loloos hodi labele produz no publika notísia sira ne’ebé nia konteúdu sensasionál no hamosu pániku iha sosiedade nia leet.
“Jornalista ho mídia iha atu ajuda redús pániku, la’ós atu aumenta situasaun sai pániku-liu tan. Kuandu mídia mós hamosu notísia sira ne’ebé sensasionál no espekulativu, ida-ne’e sei halo povu la hakmatek. Ezemplu, iha notísia ne’e dehan, posibilidade ema ne’ebé infetadu pozitivu virus korona sei aumenta ka metade husi populasaun sei infetadu. Ida-ne’e mak notísia ne’ebé nia konteúdu ne’e sensasionál no espekulativu,” nia esplika.
Iha okaziaun ne’e, hodi CI nia naran Sr. Virgílio agradese Ajénsia Nasoens Unidas (UNDP) no Governu Koreanu ne’ebé kontinua fó sira nia apoiu hodi fasilita produsaun Matadalan Reportajen COVID – 19 ne’e.
CI mós agradese AJTL no TLPU ne’ebé sai ona parseiru di’ak durante ne’e hodi luta no defende nafatin liberdade imprensa no liberdade espresaun iha Timor-Leste, liuliu iha kontestu propagasaun COVID - 19.
Durante ne’e CI harii kooperasaun no halo parseria mós ho organizasaun no ajénsia seluk, tantu iha rai-laran no rai-li’ur, hanesan SECOMS, meu komunikasaun sosiál hotu-hotu, SEAPA, IFJ, UNESCO, AJI, Dewan Pers Indonesia (DPI), LBH Pers Indonesia, PNTL, no instituisaun sira seluk.
CI harii iha 10 Maiu 2016 bazeia ba Lei Komunikasaun Sosiál, Nú: 5/2014, Fulan-Novembru atu promove liberdade imprensa no liberdade espresaun no independénsia meu komunikasaun sosiál nian husi influensia no interese hotu-hotu.