Dili, 25 Marsu 2022 – Conselho de Imprensa (CI) nu’udar instituisaun Independente Estadu nian ne’ebé hala’o nia knaar importante sira tuir Lei Komunikasaun Sosiál, Artigu 44 atu garante liberdade imprensa no liberdade espresaun iha país ne’e.
Espesialmente, iha ámbitu eleisaun prezidensiál 2022, CI kontinua ezerse ninia mandatu hodi garante no asegura implementasaun Kódigu Étika jornalístika ihe kontestu kobertura no publikasaun programa sira meiu komunikasaun sosiál nian hodi kontribui ba direitu públiku nian atu asesu informasaun loloos no kredível hodi sidadaun sira bele ezerse sira nia direitu votu iha loron votasaun.
CI uza biban ida-ne’e, kontinua hato’o apresiasaun ba meiu komunikasaun sosial sira no jornalista hotu-hotu, tantu mídia imprime, online no mídia eletrónika nia kontribuisaun no servisu tomak iha periódu pra-kompaña polítika, periódu kampaña polítika loron votasaun. Maske ho limitasaun oioin iha kontestu kobertura nian, maibé nafatin publika notisia no programa importante no relevante sira hodi hakunu públiku nia direitu atu asesu informasaun.
Kuaze semana rua resin iha periódu kampaña polítika, CI halo monitorizasaun no halo análize ba produtu jornalístiku meiu komunikasaun sosiál sira nian iha kontestu kobertura no publikasaun bazeia ba Lei Komsos, Kodigu Étika Jornalístika no prinsípiu jornalizmu universál. Alen-ne’e, CI mós halo monitorizasaun ba aktu no atitude jornalista sira nian iha mídia sosiál bazeia ba Matadalan Mídia Sosiál ba Jornalizmu no Matadalan Reportajen Eleitoral ba Jornalista no Meiu Komunikasaun Sosiál. CI nia Rezultadu monitorizasaun no análize durante periódu kampaña polítika no loron votasaun nian hatudu buat hirak tuir mai:
- Kobertura no publikasaun notisia, programa no reportajen direta (live streaming) meiu komunikasaun sosiál iha periódu kampaña polítika la fó biban balánsu ba kandidatu hotu-hotu, maibé barak-liu foka deit ba figura boot sira no kandidatu sira ne’ebé hetan apoiu husi partidu polítku sira.
- Iha mós notisia balu ne’ebé CI konsidera sensasionál no provokativu ne’ebé la kontribui ba paz no estabilidade iha railaran tamba nakunu ho opiniaun jornalista ka editór nian konsidera hanesan propaganda polítika iha periódu eleisaun prezidensiál nian.
- CI mós hetan ka identifika notisia meiu komunikasaun sosiál nian balu ne’ebé la sensivel jéneru tuir papél jéneru nian iha kontestu kobertura no publikasaun relasiona ho loron votasaun.
- Durante monitorizasaun, CI mós indentifika jornalista balu halo promosaun ba kandidatu sira liuhusi fahe-tutan informasaun no matéria sira kampaña polítika nian no halo komentáriu ne’ebé ho tendensia fó apoiu ba kandidatu hira ne’e iha sira ninia konta mídia sosiál (facebook).
Ho rezultadu monitorizasaun no análize ne’e, CI hola pozisaun no foti asaun sira tuir mai:
- Sei notifika ka fó samada ba meiu komunikasaun sosiál no jornalista sira ne’ebé komete infrasaun hasoru Kódigu Étika Jornalístika, Lei Komsos, Matadalan Reportajen Eleitoral no Matadalan Mídia Sosiál ba Jornalizmu.
- Sei fó sansaun forte ba jornalista no meiu komunikasaun sosiál sira ne’ebé komete infrasaun “grave” hasoru Kódigu Étika Jornalístika, Lei Komsos, Matadalan Reportajen Eleitorál no Matadalan Mídia Sosiál ba Jornalizmu.
- Sei mantein komunikasaun ho redasaun meiu komunikasaun sosiál sira atu asegura ninia jornalista hodi nafatin kumpri auto-regulasaun sira hanesan, Kódigu Étika Jornalítika, Matadalan Reportajen Eleitorál no Matadalan Mídia Sosiál ba Jornalizmu iha periódu segunda ronde eleisaun prezidensál.
Ami ne’ebé hato’o rezultadu monitorizasaun no hola pozisaun iha nota imprensa ne’e mak:
1. Expedito Diaz Ximenes – Prezidente Interinu CI
2. Otelio Ote – Membru
3. Benevides Correira Barros – Membru
4. Francisco da Costa Belo Simoes - Membru
#hotu#