Díli – Conselho de Imprensa de Timor-Leste (CI) hala’o audiénsia ho Prokuradoria Jerál Repúblika (PJR) hodi ko’alia kona-ba posibildade ba kooperasaun institusionál hodi bele promove di’ak liutan liberdade imprensa no liberdade espresaun iha Timor-Leste.
PJR nakloke ba kooperasaun iha área tolu importante hanesan, primeiru, bainhira simu partisipasaun, informasaun, dadu, elementu sira ne’ebé nesesáriu no útil ba investigasaun krime kona-ba “Atentadu ba Liberdade informasaun”.
Segundu, organiza hamutuk semináriu, kolókiu, konferénsia sira hodi debate no análiza interese komun instituisaun rua refere. Terseiru, majistradu sira Ministériu Públiku nia administrasaun sira formasaun nian destinadu ba jornalista sira kona-ba tema oi-oin ne’ebé konsidera útil no importante hanesan segredu justísa no ezersísiu jornalízmu nian, impaktu husi alterasaun sira kódigu prosesu penal nian kona-ba atividade sira órgaun komunikasaun nian, no regulasaun ba komunikasaun sosiál no justísa.
Iha audiénsia ne’e, Parte rua (CI no PJR) konkorda hamutuk hodi estabelese ekipa téknika hodi bele elabora dokumentu kooperasaun nian nune’e, iha tempu besik bele ofisializa husi entidade rua refere.
Konstituisaun RDTL garante iha artigu 40 kona-ba Liberdade espresaun no informasaun no iha artigu 41 kona-ba Liberdade impresan no meiu sira komunikasaun nian. Lei nú 5/2019, loron 19 fulan novembru (Lei Komunikasaun Sosiál) hodi konkretiza norma konstitusional sira ne’ebé atu garante, proteje no regula ezersísiu Liberdade informasaun, meiu komunikasaun sosiál nian.
Conselho de imprensa nu’udar entidade administrativa independente no hala’o ninia atribuisaun no kompeténsia ne’ebé la submete ba diresaun ka orientasaun sira husi podér polítiku nian.
CI iha atribuisaun importante sira tau matan ba konduta profisionál no étika kona-ba profisionál sira jornalizmu no operadór meiu komunikasaun sosiál nian sira, nune’e mós garante atu kumpri kondisaun sira ba asesu no hala’o atividade jornalístika sira. (CI)