Komunikadu Imprensa

Conselho de Imprensa Hato’o Kontinénsia no Apresiasaun ba Jornalista Balibo Five ne’ebé Kontribui ona ba Timor-Leste nia Independensia

Conselho de Imprensa Hato’o Kontinénsia no Apresiasaun ba Jornalista Balibo Five ne’ebé Kontribui ona ba Timor-Leste nia Independensia

Dili, 16 Outubru 2017 – Relasiona ho komemorasaun loron Balibo Five, 16 Outubru, loron ne’ebé jornalista estranjeiru nain lima mate iha Timor-Leste, Conselho de Imprensa Timor-Leste (CI) uza biban ida-ne’e hodi hato’o kontinénsia no apresiasaun ba jornalista nain-lima ne’e tamba kontribui ona ba libertasaun nasionál no povu ida-ne’e ninia hakarak lulik ba ukun-rasik.

Prezidente Coselho de Imprensa, Virgilio da Silva Guterres hateten katak loron 16 Outubru nu’udar loron importante tebes ba vida jornalizmu iha railaran tamba iha loron ne’e duni, iha 1975, forsa Indonézia sira tortura no oho jornalista Australianu nain-lima iha tempu ne’ebá, ne’ebé halo hela kobertura ba invazaun forsa Indonézia (ABRI) nian mai teritóriu Timor-Leste iha parte fronteira.

“Hakarak uza biban ida-ne’e hodi hateten katak asasinatu hasoru jornalista estranjeiru nain-lima ne’e nu’udar tristeza boot ba mundu jornalizmu, liliu ba sira ne’ebé luta ba direitu ema nian ba informasaun, justisa no lia-loos. Hodi Conselho de Imprensa nia naran, ha’u hato’o apresiasaun ba sira nain-lima ninia kontribuisaun ba Timor-Leste ninia independensia, inklui mós ba jornalista Senior, Roger East ne’ebé tropa Indonezia sira oho iha Ponte Kais Dili hafoin trajedia iha Balibo,” Prezidente CI ne’e haktuir.

Prezidente CI ne’e afirma, jornalista nain-lima, inklui Roger East ninia kontribuisaun iha tempu ne’ebá importante tebes tamba bele sai ezemplu di’ak ba jornalista Timor Oan hotu-hotu atu luta nafatin iha atividade jornalístika hodi halo transformasaun sosiál liuhusi sira ninia funsaun kontrolu sosiál iha país demokrátiku Timor-Leste.

“Kontribuisaun jornalista hirak ne’e nian nu’udar bukaer ida atu mídia ka jornalista Timor Oan sira atu banati-tuir hodi kontribui ba dezenvolvimentu nasionál no hatutan lian husi sira ne’ebé kbit laek no kobre populasaun sira ne’ebé hasoru difikuldade iha sira nia moris loro-loron tamba objetivu ida husi jornalizmu mak tane-aas interese ema barak nian duke interese grupu ka individu nian,” tenik nia.

Prezidente CI ne’e kontinua husu kanál mídia hotu-hotu, liuliu jornalista sira Timor Oan atu nafatin serbisu ho profesionál atu tranzmite informasaun loloos, ezatu no objetivu liuhusi prinsipiu disiplina verifikasaun ho fonte hotu-hotu, nune’e bele evita konflitu no hamenus tensaun polítika iha railaran no tane-aas nafatin peace journalism iha ita-boot sira ninia atividade no produtu jornalístika.

“Conselho de Imprensa mós hato’o ninia apresiasaun ba jornalista Timor Oan hotu-hotu ne’ebé dadauk ne’e hala’o hela knaar jornalizmu iha railaran, maske ho limitasaun no difikuldade oioin. Maibé, ita-boot sira konsege hala’o duni papél no funsaun kontrolu sosiál iha prosesu dezenvolvimentu nasionál país nian,” Dehan Virgilio.

Jornalista “Balibo Five” sira mak hanesan, Greg Shackleton, Tony Stewart, Brian Peters, Malcolm Rennie no Gary Cunningham.

Conselho de Imprensa nu’udar entidade administrativa independente ida no hala’o ninia atribuisaun no kompetensia ne’ebé la submete ba diresaun ka orientasaun sira husi podér politíka nian. CI nia misaun prinsipál mak atu promove liberdade espresaun no liberdade imprensa iha railaran.