Dili, 21 Juñu 2022 – Conselho de Imprensa Timor-Leste (CI) liuhusi konferénsia imprensa ida-ne’e hakarak hato’o ofisialmente ba públiku, kanál mídia, jornalista no asosiasaun jornalista sira katak, CI liuhusi ninia plenaria foin dadauk ne’e halo ona deliberasaun ho númeru 07/2022, de 06 de Maio hodi halo prémiu jornalizmu foun ho naran “Prémiu Max Stahl ho kategoria dokumentáriu di’ak-liu ba asuntu direitu umanu hanesan prémiu sira seluk ne’ebé antes ne’e atribui ona ba jornalista mellór sira.
Durante konferésia imprensa ne’ebé realiza iha Tersa (21/6) iha Edefisiu CI - Quintal – Dili, Prezidente CI, Virgílio da Silva Guterres hateten prémiu ne’e nu’udar onra no apresiasaun ba Jornalista Naran Boot, Max Stahl ne’ebé kontribui ona ba luta libertasaun nasionál ba Timor-Leste nia ukun rasik-an liuhusi misaun lulik jornalizmu iha pasadu.
“Desizaun ba Prémiu foun ho naran Max Stahl ne’e Conselho de Imprensa foti liuhusi plenaria ho ida-ne’e ita delibera kedas no publika ona iha Jornál da Républika. Tan-ne’e, ohin Conselho de Imprensa uza biban ida-ne’e ho publikamente hato’o katak ita iha tan prémiu jornalizmu foun ba jornalista Timor-oan sira atu aplika.’”
“Prémiu ne’e ita tau naran Max Stalh tamba saudozu Max Stahl nu’udar jornalista naran-boot ne’ebé kontribui ona ba Timor-Leste nia independésia liuhusi ninia obra jornalístika iha tempu okupasaun militár Indonézia nian,” tenik nia.
Prezidente CI ne’e haktuir, anúnsiu prémiu foun ne’e nu’udar oportunidade di’ak ba jornalista, kanál mídia no asosiasaun jornalista sira atu kontinue promove no defende direitu umanu iha país demkorátiku ida-ne’e, liuliu nafatin promove liberdade imprensa no liberdade espresaun atu sidadaun Timor-Oan hotu-hotu ninia direitu ba informasaun, edukasaun, saúde, bee no saniamentu garantidu iha país foun ne’e.
“Prémiu foun ne’e alen-de atu fó onra ita nia Jornalista no eroi-boot Max Stahl, prezensa prémiu ne’e rasik mós atu motiva no enkoraja jornalista, kanál mídia no asosiasaun jornalista sira tu kontinue promove no luta ba direitu sidadaun nian ba moris di’ak, liuliu publika notisia sira ne’ebé iha ligasaun problema sosiál ne’ebé povu Timor hasoru, hanesan problema infrastrutura, edukasaun, saúde, bee-moos, saniamentu no seluk-tan. Nu’udar halo funsaun kontrolu sosiál jornalista no mídia tenke sai lian ba sira ne’ebé kbit laek ka voice of the voiceless,” Sr. Virglio hateten.
Entertantu, desizaun hodi hamosu premiu foun, Max Stahl ne’e mós bazeia ba Lei Komunikasaun Sosiál, Artigu 44 no Projetu Rezolusaun Parliamentu Nasionál númeru 83/V (4ª) institui Prémiu Max Stahl nu’udar rekoñesimentu ba Saudozu Max Stahl nia luta ba libertasaun nasionál liuhusi ninia obra jornalístiku sira.
CI nu’udar entidade independente Estadu nian, harii iha 10 Maiu 2016 bazeia ba Lei Komunikasaun Sosiál, Nú: 5/2014, Fulan-Novembru atu promove liberdade imprensa no liberdade espresaun no independénsia meu komunikasaun sosiál nian husi influénsia no interese hotuhotu.
Ba informasaun detáilu, halo-favór kontakta pesoál sira CI nian tuir mai ne’e:
- Alberico da Costa Junior; telefone: 7725470 ka 73173445, email: Este endereço de email está sendo protegido de spambots. Você precisa do JavaScript ativado para vê-lo.
- Maria Bibel 77089009/73173448, email: Este endereço de email está sendo protegido de spambots. Você precisa do JavaScript ativado para vê-lo.
- Angelina Gusmao:73553015 email: Angelina GusmaoEste endereço de email está sendo protegido de spambots. Você precisa do JavaScript ativado para vê-lo.