CI - Tuir Lei Komunikasaun, Artigu 44, Conselho de Imprensa nia papél prinsipál mak promove liberdade imprensa no liberdade ba espresaun iha Timor-Leste. Atu konkretiza papél ida-ne’e, Consehlo de Imprensa durante ne’e fó formasaun ba jornalista sira iha area jornalizmu, maibé atu introdús no fó koñesimentu ba públiku in jerál kona-ba papél mídia no jornalizmu ne’e nesesáriu iha sosiedade demokrátiku ida hanesa Timor-Leste.
Entaun, atu muda maneira hanoin públiku nian kona-ba ezisténsia no papél mídia nian, públiku la’ós de’it sai haree-na’in, rona-na’in ka lee-na’in de’it, maibé oinsá sira observa no komprende konteúdu produtu jornalísitku ne’ebé mídia publika.
Ho razaun ida-ne’e, Conselho de Imprensa liuhusi Diresaun Análize no Dezenvolvimentu Mídia (DADM) realiza “Media Literacy Training ka treinamentu Alfabetizasaun mídiatika” hodi fortaleza públiku atu krítiku liu ba konteúdu produtu jornalístiku, no determina informasaun saida mak presiza husi kanál mídia sira. Alfabetizasaun mídiatika ida-ne’e nu’udar abilidade asesu, analiza, evalua, no komunika informasaun sira husi kanál mídia oioin.
Iha 2024, alvu Conselho de Imprensa nian mak Estudante sira Ensinu Sekundáriu Jerál no Ensinu Sekundáriu Tékniku-Vokasionál sira iha Munisipiu Baucau, Munisipiu Liquisa no Munisipiu Aileu.
Iha Munisipiu Baucau hala’o iha Ensinu Sekundáriu Tékniku Informatika ETI Baucau no Ensinu Sekundáriu Tékniku-Vokasionál Publika Baucau ho total estudante hamutuk 30, Feto: 12 - Mane: 18, iha 27-29 Fevereiru 2024.
Munisipiu Liquisa, hala’o iha Ensinu Sekundáriu Jerál Públiku Hu Iso Lara Iso no Ensinu Sekundáriu Tékniku-Vokasionál ho total estudante hamutuk nain 30, Feto: 18 - Mane: 12, iha 12-14 Marsu 2024. Munisipiu Aileu hala’o iha Ensinu Sekundáriu Tékniku-Vokasionál Aileu, ho total estudante 30, Feto 21-Mane 9, iha loron 19-21 Marsu 2024.
Tema Formasaun ne’e mak: “foin-sa’e Matenek Mak Aproveita, Kria no partilla Informasaun ho Responsabilidade.” Ho oradór no matéria treinamentu hanesan tuir mai: Koñese jornalizmu no Relasaun Publika fasilita husi Diretór DADM CI, Alberico da Costa Junior. Planu kobertura no aprezentasaun planu kobertura. Entrevista, Tékniku Superior Formasaun DADM CI, Maria Bibel. Tékniku Hasai Fotografia Báziku, Senior Fotógrafu, Tékniku verifika faktu báziku, Prezidente AJTL, Zevonia Vieira.
Iha tinan 2023, Conselho de Imprensa realiza ona atividade Media Literacy Training ka treinamentu alfabetizasaun mídiatika iha Dili ba estudante ensinu sekundáriu jerál, privadu no Katólika sira ne’ebé eziste iha Dili. (CI)