Díli - Prezidente Conselho Imprensa de Timor Leste (CI), Otelio Ote, partisipa iha surumutu ne'ebé realiza entre CI-TL ho g7+, hodi fahe informasaun kona-ba progresu servisu no advokasia hosi Organizasaun Intergovernamentál g7+ iha nasaun sub-dezenvolvidu sira.
Prezidente CI hatete, enkontru ne’e atu fahe informasaun no aumenta jornalista nia koñesimentu no esperiénsia kona-ba programa paz no estabilidade ne'ebé durante ne’e g7+ halibur nasaun 20 afeita husi konflitu no frajilidade, atu oinsa promove paz no rekonsiliasaun liu husi produtu jornalizmu.
"Ita hatene katak jornalista sira maioria remata Sekundaria, entaun liu husi atividade ne’e bele sai matadalan no oinsa eleva kapasidade intelektuál jornalista nian hodi promove paz no rekonsiliasaun liu husi produtu jornalístika", Tenik Prezidenti CI durante enkontru loron sorin, iha Atividade Forum Editoriál, iha edefisiu g7+, Palacio do Governu, Sesta, 09/02/2024.
Otelio Ote esplika katak, enkontru ne’e nudar meius atu ajuda jornalista kompriende kona-ba g7+, nune bele produs notisia ne’ebé diak hodi publiku kompriende knar hosi instituisaun internasionál ne’e.
Iha biban ne’e, Adjuntu Sekretáriu Jerál g7+, Habib Urrehman Mayar hateten, sorumutu ne’e importante atu hato’o informasaun konaba progresu servisu G7+ , planu no mesmu tempu rona hosi jornalista ou Mídia sira ne’ebé nudar elementu ba liberdade, demokrasia no establidade.
Tuir nia, Mídia iha papel importante atu komunidade Internasionál sira bele hatene saida mak akontese iha Timor-Leste.
“Sidadaun estranjeirus balun seidauk hatene realidade iha Timor-Leste ne’ebé wainhira ha’u ba rai liur balun husu ba ha’u Timor-Leste sei funu ka, ha’u dehan lae”, esplika Habib Urrehman Mayar.
Iha biban ne’e Responsavel Komunikasaun no Mídia g7+, Helche Silvester esplika kona-ba esperensia, progreseu servisu no retornu ne’ebé g7+ atinji iha nivel internasionál inklui programa iha rai laran hodi hametin estabilidade, pas no dezenvolvimentu.
Iha sesaun husu no hatan, partisipantes sira rekomenda atu atividade ne’e kuntinua, lori mídia hosi nasaun membru g7+ (Ruwanda) mai Timor-Leste hodi fahe esperiénsia, intervensaun g7+ ba funu iha Ukraina, Gaza inklui konflitu iha nasaun membru g7+ balun no rekomendasaun sira seluk.
Partisipa mós iha sorumtu ne'e, Prezidente TLPU, Xefi Redasaun no Jornalista hosi GMN, RTTL,EP, Independente, Radio Voz no seluk tan. (CI)