Díli – Kinta-feira, 1 Fevereiru 2024, Conselho de Imprensa de Timor-Leste (CI), hala’o validasaun ba Matadalan Jornalízmu Inkluzivu, iha Salaun enkontru Conselho de Imprensa, Quintal Boot, Díli.
Partisipa iha atividade validasaun maka respondente sira husi Munisípiu (Baucau, Ainaro, Covalima no Oecusse) no nasionál (Akademista, RHTO, Organizasaun Mídia, Ativista, LGBTQI+, Lia Na’in no PDHJ).
Projetu dezenvolve Matadalan Jornalízmu Inkluzivu ne’e realiza tanba serbisu hamutuk entre CI ho ABC-ID hodi bele tulun jornalista sira hodi hasa’e sira nia koñesimentu iha área espesiku hanesan inkluzivu.
Diretór Ezekutivu, Antonio Dias hatete matadalan ne’e importante ba jornalista sira, tanba ne’e, DE husu parte hotu atu bele serbisu hamutuk hodi bele kontribui ba serbisu jornalizmu nian ne’ebé la viola prinsípiu kódigu étika jornalízmu.
“Ohin tempu atu agradese ba ita boot sira ne’ebé fó ona hanoin, atu la kleur tan ita lansa matadalan Jornalízmu inkluzivu ida ba públiku. Ita hotu hamutuk iha fatin ne’e sei kontribui ba serbisu jornalízmu hodi labele esklui tan parte balun iha ita nia rain,” dehan Diretór Ezekutivu, Antonio Dias.
Aleinde ne’e, Prezidente Conselho de Imprensa, Otelio Ote hatete matadalan ne’e importante ba komunidade mídia tanba durante ne’e komunidade mídia hala’o prátika jornalízmu bazeia de’it ba sira nia esperiénsia pesoál no formasaun sira iha sentru formasaun jornalízmu.
“Livru ida ne’e tenke sai duni matadalan ba jornalista sira hodi hala’o prátika jornalízmu nian iha sira nia serbisu loron-loron. Presiza atu halo sosializasaun ba jornalista sira atu bele hatene utiliza termu-termu sira ne’ebé relevante ho tema jornalízmu inkluzivu,” esplika Prezidente Conselho de Imprensa, Otelio Ote.
Prezidente hato’o agradese wa’in ba partesipantes sira hotu ne’ebé mai husi munisípiu no iha kapitál Díli hodi bele partisipa iha atividade validasaun matadalan jornalízmu inkluzivu.
Ba futuru Conselho de Imprensa kontinua produz matadalan sira iha área oi-oin hodi bele tulun jornalista sira nia atividade jornalízmu nian iha Timor-Leste. (CI)