Díli - Prezidente Conselho de Imprensa de Timor Leste (CI), Otelio Ote, partisipa aniversáriu mídia online SAPNewsTL ba dala rua ne’ebé realiza iha salaun UNITAL, Becora, Díli, iha loron 23 Fevereiru 2024.
Iha ámbitu aniversáriu, Mídia Online SAPNewsTL mós lansa sira nia plataforma dijital hanesan Youtube, Instagram no Tiktok.
Prezidenti CI aproveita okajiaun ida ne’e liuhusi nia intervensaun, hato’o votus parabens ba ekipa tomak iha SAPNewsTL, konsege existe tinan rua nu’udar instituisaun komunikasaun sosiál.
Prezidente Otelio Ote dehan “Ha’u konta istoria oituan iha tinan rua liu ba SAPNewsTL hahú lansa iha Dili, primeiru rejistu ba CI, ami dúvida iha mídia ida ne’e no mídia ida ne’e grupu se nian, mídia estabelese iha ne’ebé no iha kapasidade sustentável ka lae?”.
“Entaun momentu ne’ebá plenaria kuaze dala tolu, ami reseita tiha atu halo aprovasaun, entaun bainhira ezekutivu sira hato’o relatoriu mai, ami hare konteudu husi plataforma ne’e, afinál notisia ne’e mesak didiak no ema sira estabele portal ne’e mesak intelektual de’it, ho ida ne’e ami dehan tenki homologa tanba sira iha sensibilidade atu bele servisu ho komprimísiu tempu naruk.” dehan Prezidenti CI.
Komemorasaun aniversáriu mídia online SAPNewsTL ba dala rua, realiza mós semináriu ho tema “Mídia Espíritu ba Liberdade, Demokrasia, Justísa, Domin no Paz”.
Partisipa iha komemorasaun ne’e, Sekretáriu Estadu Komunikasaun Sosiál, Expedito Loro Dias Ximenes, Prezidente Conselho de Imprensa, Otelio Ote, Konselleira SAPNewsTL na’in haat, Diretór no estrutura SAPNewsTL, estudante Komunikasaun Sosiál UNTL nomos konvidadu sira seluk. (CI)