Manufahi, 12/12/2023 - Conselho de Imprensa de Timor-Leste (CI), realiza Retiru Anuál durante Loron rua nia laran, hahú husi loron Tersa to’o Kuarta-feira iha Postu Administrativu Same, Munisípiu Manufahi.
Retiru anuál ida ne’e ho objetivu atu halo avaliasaun ba progresu servisu sira durante tinan ida nia laran ne’ebé hala’o husi Diresaun sira iha Conselho de Imprensa de Timor-Leste.
Diretór Ezekutivu Interinu Conselho de Imprensa de Timor-Leste (CI), Antonio Dias iha abertura dehan, “Ita ohin iha Same atu fahe ita nia servisu Tinan ida nian, saída mak ita halo ona, ita halo oinsá, ita halo hanesan ne’ebé, semak halo, oinsa mak ita halo iha nia dezafiu saída?”.
Prezidente Conselho de Imprensa de Timor-Leste (CI), Otelio Ote hafoin abertura fó nia hanoin katak iha tinan ne’e programa barak mak konsege Conselho de Imprensa ezekuta tuir nia programa no planu sira ne’ebé trasa ona hafoin retiru tinan rua liu ba iha Maubara.
“Ha’u hanoin tinan 2023 ita atinji servisu barak, ita konsege ezekuta tuir ita nia planu ne’ebé ita trasa ona iha tinan rua liu ba iha Maubara, progresu sira ne’ebé ita liu, ha’u hanoin diretór sira mak koñese di’ak liu ami iha plenária, ami hein relatóriu sira nian liu husi Diretór Ezekutivu, ami diskute malu iha Plenária dala ruma ami mós la simu malu iha Plenária, maibé desizaun sira ne’ebé sai mai ne’e nia valór komum ba ita nia organizasaun laran,” Prezidente hatete iha abertura retiru Anuál.
Retiru Anuál ne’e loke direitamente husi Prezidente Conselho de Imprensa de Timor-Leste (CI), Otelio Ote,Akompaña husi membru Amito Araujo, nomós Membru Benevides Correia Barros, Diretór Ezekutivu Interinu, Antonio Dias, inklui Diretór Diresaun sira.
Partisipa iha Retiru Anuál ida ne’e mai husi ajente Ofisiál sira husi kada Diresaun iha Conselho de Imprensa nian. (CI)