Bali – Conselho de Imprensa de Timor-Leste (CI) maka lidera prezidensia organizasaun Southeast Asian Press Council-Network (SEAPC-Net) iha períodu tinan 2023-2025, liuhusi enkontru segunda asembleia jerál, iha Bali, Indonézia, 29 Novembru 2023.
Tuir estatutu SEAPC-Net, tranferénsia lideransa SEAPC-Net bazeia ba órden alfabetu, nune’e, tuir loloos, hafoin Dewan Pers Indonesia maka lidera prezidénsia organizasaun SEAPC-Net husi tinan 2019 to’o 2023, kontinua kedan husi entre Myanmar Press Council, The National Press Council of Thailand.
Maibé, Myanmar ho Thailand seidauk prontu atu lidera organizasaun SEAPC-Net, entaun liuhusi Asembleia Jerál, Membru sira deside entrega Prezidénsia SEAPC-Net ba Conselho de Imprensa de Timor-Leste mak lidera.
Prezidente SEAPC-Net, Otélio Ote (CI), Sekretáriu Jerál, Benevides Correia Barros (CI), Vise Prezidente, Ohn Maung (MPC), Diretór SEAPC-Net CI nian maka Konselleiru Amito Araujo, Diretór SEAPC-Net Indonézia maka Ninik Rahayu, Diretór SEAPC-Net Thailandia maka Chavarong Limpattamapanne no Diretór SEAPC-Net Myanmar maka Zaw Than.
Segunda asembleia SEAPC-Net ko’alia kona-ba amandamentu ba enkuadramentu legál (estatutu) organizasaun SEAPC-Net, espansaun organizasaun SEAPC-Net ba Conselho de Imprensa sira iha Azean atu bele hola parte iha rede Conselho de Imprensa ne’e.
Aleinde ne’e, ko’alia mós kona-ba sustentabilidade SEAPC-Net nian iha futuru, liu-liu oinsá bele kria programa atividade sira bazeia ba misaun no vizaun organizasaun SEAPC-Net nian, ikus liu maka entrega prezidénsia organizasaun SEAPC-Net husi Dewan Pers Indonézia.
Enkontru segundu asembleia jerál SEAPC-Net, hala’o iha Ótel Le Méridian, Bali, 29 Novembru 2023, partisipa husi Dewan Pers Indonesia, Myanmar Press Council, The National Press Council of Thailand no Conselho de Imprensa de Timor-Leste. (CI)