Jakarta - Prezidente Conselho de Impresa de Timor-Leste (CI), Otélio Ote, akompaña husi Membru CI, Isabel M.F. de Jesus, Diretór Diresaun Relasaun Institusionál no Informasaun CI, Altino da C.Freitas no ekipa tekniku, hala'o enkontru ho Espesialista Programa Komunikasaun UNESCO, Ana Lamtodze ho equipa tekniku UNESCO, iha salaun enkontru UNESCO, Senayan, Jakarta Sentrál.
Sorumutu ne’ebé hala’o iha segunda-feira (13/11/2023) ne’e, hodi koalia konaba planu kooperasaun entre instituisaun rua iha tinan 2024, liu husi programa kapasitasaun ba jestaun mídia, kria kodígu konduta jornalístika, matadalan monitorizasaun ba radiodivuzaun, kapasitasaun pesoál CI no seluk tan.
Enkontru ne’e nu’udar ajenda ida hosi visita delegasaun CI durante semana ida iha Jakarta, Indonesia, hahu 12 -18/11/2023, hodi hala’o enkontru ho parseiru CI nian mak hanesan DPI, UNESCO, LPDS, Kompas no AJI.
Antes ne’e CI no UNESCO implementa ona programa servisu hamutuk liu husi asina nota de intendimentu entre instituisaun rua (02/05/2017), iha ambitu komemorasaun loron mundiál liberdade imprensa, ne’ebé hala’o iha Jakarta, Indonesia.
Kooperasaun ne’e ho objetivu atu kria no haforsa Mekanismu Auto-regulasaun Mídia iha Timor-Leste hodi kontribui no promove ambiente favoravel ida ba mídia nia sustentabilidade, livre, independente no profIsionál.
Programa ne’ebé implementa iha akordu ne’e mak hanesan, UNESCO fasilita partisipasaun CI iha komemorasaun loron mundiál liberdade imprensa, Konferénsia Internasionál Dili Dialogue Forum, Atribuisaun Karteira Profesionál, Forum Nasionál Editoriál, Kria matadalan mídia sosiál, Treinamentu Mediasaun, Treinu ba treinador konaba fack checking no seluk tan.
Akordu servisu hamutuk ne’e ho durasaun tinan 3, hahú Janeiru 2018 ate 2020 maibé foin finaliza iha 25/03/2022 tanba impaktu hosi Covid-19.