BALIBO - Conselho de Imprensa de Timor-Leste (CI) serbisu hamutuk ho Australian Broadcasting Corporation International Development (ABCID), fasilita “Investigative Journalism Training” ba jornalista sira, iha iha Salaun Konferénsia Balibo Fort Hotel, Suku Balibo Vila, Postu Administrativu Balibo, Munisipiu Bobonaro.
Iha abertura, Diretór Ezekutivu Interinu CI, António Dias hateten, Treinador ba treinamentu Investigativu ne’e iha tinan 40 resin iha área ne’e, ne’ebé uza didiak oportunidade ida ne’e.
“Ha'u hein katak loron ruma ita nia lee nain sira, rona nain sira, hakerek nain sira mak sei basa liman ba imi liu husi imi nia produsaun”, esplika António Dias.
Iha oportunidade ne’e, Prezidente Conselho de Imprensa de Timor-Leste (CI), Otelio Ote, hateten
ABC Internasionál Orienta hahu atu investe husi partisipantes nain 11, atu iha kapasidade hakerek no esperitu nudar jornalista investigativu.
Otelio Ote mós husu ba partisipantes sira atu hatudu responsabilidade no komprimisiu ba programa treinamentu ne’e tanba kooperasaun entre CI ho ABCID ne’e mos sei kuntinua, “ Hau hanoin ABC sei hamutuk ho ita, ita sei iha Koopersaun iha tempu naruk nia laran”, Prezidente CI nia promote.
Nune’e mós Formador husi ABC Internasionál, Aaron Kearney, Director of Engagement and Programs - ABC International Development, hamutuk ho nia nia kolega formador Mark orgulhu iha oportunidade ida ne’e hodi apoiu ka suporta nomos kria oportunidade ba Timor - Leste no kria fatin informasaun ida ne’ebe ho kualidade ba Futuru.
“Obrigadu ba atuál Adjuntu PDHJ Rigoberto Monteiro ne’ebe uluk nudar Diretór Ezekutivu (CI) ho nia vizaun ba oin kona-ba kria posibilidade treinamentu iha fatin espesiál ida ne’e”, dehan nia.
Iha biban ne’e Adjunto PDHJ, Rigoberto Monteiro esplika katak, atividade ne’e nudar treinamentu ba daruak ne’ebé fasilita hosi ABCID. Enkuantu treinamentu fase dauluk hala’o iha regiaun Espesiál Oecussi ho intensaun partisipantes sira bele banati tuir servisu ne’ebé jornalista nain 5 ne’ebé mate iha Balibo iha tinan 1975 liu ba.
“Sira tenta atu identifika Militar Indonesia infiltra Timor iha Nasaun rua nia leet mak Indonesia ho Australia, tamba ne’e atu foti Espiritu sira nain lima nian ne’e atu koko banati para depois ita boot sira liu tiha formasaun hakarak halo notisia invetigativu ruma,” esplika Rigoberto Monteiro.
Treinamentu durante loron haat (16-19 Outubru 2023), partisipa husi husi Jornalista Radio Komunidade Kafe Ermera, Radio Liberdade Dili, Jornál Independente, Jornál Timor Post, midia Online Lafaek News, Naunil, Esperansa, Sapnews, Cot, Yokolau inklui jornalista hosi Online Hatutan ho totál partisipantes na’in 11 kompostu husi mane 6 no feto 5.
Materia ba treinamentu ne’e maka hanesan identifika estoria, susesu nudar jornalista investigatifu, kodígu étika journalistíka no mídia, kapasidade intervista, seguransa fisiku no dijitál, planu reportajen investigativu inklui materia relevante sira seluk. (CI)