Balibo – Conselho de Imprensa de Timor-Leste (CI) realiza Forum Nasionál Editoriál ho tema “Independénsia Editoriál no Kualidade Produtu Jornalístiku”, iha loron 15 outubru 2023, iha Postu Administrativu Balibo, Munisípiu Bobonaro.
Prezidente Conselho de Imprensa, Otelio Ote iha abertura hatete Conselho de Imprensa nu’udar órgaun reguladór hodi bele garante katak funsionamentu kódigu étika bele la’o ho di’ak katak mídia sira halo publikasaun hotu tuir prosesu legál.
Forum Nasionál Editoriál nu’udar espasu ida ba Conselho de Imprensa no komunidade mídia hodi halo diskusaun no fahe esperiénsia ba malu kona-ba andamentu liberdade imprensa no liberdade espresaun iha Timor-Leste.
Haktuir iha Planu Asaun Anuál Conselho de Imprensa nian, iha mós atividade ida ho naran Forum Editoriál ho nia parseiru serbisu sira hanesan mídia na’in, responsável órgaun no meiu komunikasaun sosiál, xefe redasaun, editor no jornalista sira.
Ordór ba forum nasionál editoriál maka hanesan Sekretáriu Estadu Komunikasaun sosiál, Expedito Loro Dias Ximenes, Na’in ba Mídia Online Hatutan.com, Raul Lemos, Xefe Redasaun GMN, Delfim de Oliveira no Prezidente Aliansi Jornalis Independen (AJI), Sasmito no modera husi konselleira Isabel Fernandes.
Partisipa iha eventu anuál ne’e maka, Adjuntu Provedór Diretus Umanus, Administradór Postu Balibo, responsável órgaun no meiu komunikasaun sosiál sira, Xefe Redasaun, Editór, Jornalista, Asosiasaun Jornalista (AJTL, TLPU, UPJTL, ARKTL), inklui mós mídia husi indonézia. (CI)