Balibo – Conselho de Imprensa de Timor-Leste (CI) atribui prémiu jornalizmu tinan 2023 ba manan na’in sira iha ámbitu komemorasaun loron nasionál Liberdade imprensa ba dahuluk, iha Postu Administrativu Balibo, Munisípiu Bobonaro, 16 outubru 2023.
Prémiu Jornalizmu tinan 2023 maka hanesan Prémiu Adelino Gomes ba kategoria reportájen lian portugés, prémiu Bernardino Guterres ba kategoria foto jornalízmu no prémiu Francisco Borja da Costa ba kategora mídia hakerek (Online no Jornál).
Manán na’in ba Prémiu Jornalízmu Tinan 2023 maka hanesan “Prémiu Adelino Gomes” ho Produtu Jornalístiku iha Lian Portugés ho títlu “Migração das Baleias Sobre Sobre os Fenómeno ao Alcance do olhar do Povo Timorense”, atribui ba Constantino Savio M. Maia, Jornalista Mídia Timor Post.
“Prémio Bernardino Guterres” ba produtu Foto Jornalístiku ho títlu “Hafoin Parlamentu Nasionál Kansela Sosa Kareta Foun, Reitór UNPAZ Organiza Estudante Ezije tan Alterasaun LPV”, atribui ba Elidio dos Santos da Costa, Jornalista Mídia Online Hatutan.com.
“Prémiu Francisco Borja da Costa” ba produtu jornalístika kategoria Mídia hakerek (Jornál no Online) ho títlu “Deskonfia, MAPKOMS Nu’udar Prezidente FFTL fó Projetu iha RTTL ba Sekretária FFTL”, atribui ba Cipriano Colo, Jornalista Mídia Online Hatutan.com.
Prémiu Jornalizmu nia objetivu maka atu hasa’e kualidade produtu jornalístiku no hametin ninia kredibilidade iha públiku, atu enkoraza númeru kobertura ba asuntu espesifiku, atu fó rekoñesimentu ba jornalista sira nia obra, atu fó kontribuisaun ba dezenvolvimentu lian (portuges no tetun), no atu fó rekoñesimentu ba meiu komunikasaun sosiál nia esforsu ba hadi’ak kualidade ninia jestaun no rekursu umanu. (CI)