Dili – Conselho de Imprensa de Timor-Leste (CI) atribui tan karteira professional ba profesional komunikasaun sosiál na’in 11 ne’ebé konklui ona sira nia prosesu estájiu profssional.
Jornalista na’in 11 maihusi órgaun no meiu komunikasaun sosiál rua maka hanesan Rádiu Televizaun Timor-Leste, Empreza Públika (RTTL, EP) hamutuk na’in 10 no na’in 1 husi Ajénsia Notisioza TATOLI.IP.
Jornalista hirak ne’e maka hanesan Arminda Carvalho, Ninito de Jesus da Costa, Domingos de Jesus, Sergio da Silva, Ines das Dores, Lucia Canossa da Silva, Crispin da Silva Alves, Agostinho Neno, Flavio Barros, Natalino da Costa no Nuno Ramalho Viana Morais.
“Sira ne’ebé simu karteira professional ohin loron la’ós jornalista foun, ema ne’e hala’o tiha ona kna’ar tinan barak nia laran. Ho karteira professional ida ne’e justifika tan de’it sira nia profesaun,” hatete Prezidente Conselho de Imprensa, iha serimónia atribuisaun karteira professional, iha Restaurante Golden Star, Audia-Dili, iha loron kuarta-feira, 04/10/2023.
Prezidente Conselho de Imprensa, Otelio ote husu ba jornalista hirak ne’e atu kontinua mantein profesionalízmu no respeita kódigu étika jornalístika nu’udar matadalan ba hala’o kna’ar jornalismu ne’e rasik.
Jornalista Arminda Carvalho hatete ho karteira professional ne’ebé sira simu nu’udar rekoñesimentu ba sira nu’udar professional komunikasaun sosiál iha Timor-Leste ne’ebé durante ne’e hakna’ar-án iha RTTL, EP no TATOLI.IP.
“ohin nu’udar loron importante ba ami hirak ne’e nia hakat nu’udar jornalista ne’ebé durante ne’e hala’o kna’ar hanesan buka, hakerek no publika notísia ba públiku iha Timor-Leste,” esplika Arminda Carvalho.
Kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Konsellu Imprensa mak fó no renova.
Asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.
Konsellu Imprensa nu’udar entidade administrativa independente no hala’o ninia atribuisaun no konpeténsia ne’ebé la submete ba diresaun ka orientasaun sira husi podér polítiku nian. (CI)