Oecusse, 16/08/2023 – Prezidente Conselho de Imprensa de Timor-Leste (CI), Otelio Ote hala’o enkontru kortezia ho Prezidente Autoridade Reziaun Administrativa Espesiál Oecusse Ambeno (RAEOA), Arsenio Paixão Bano.
Enkontru ne’e hala’o iha sala enkontru Prezidente Autoridade RAEOA, kuarta-feira, 16 agostu 2023, iha Baero Santa Rosa, Oecusse.
Iha enkontru ne’e, Prezidente CI relata ba Prezidente Autoridade RAEOA kona-ba atividade “Journalism Fundamentals Training” ba jornalista sira ne’ebé hala’o iha RAEOA durante loron tolu (14-16 agostu 2023).
Alein de ne’e, Prezidente CI konvidade Prezidente Autoridade RAEOA atu bele partisipa iha atividade distribuia sertifikadu ba partisipantes “Journalism Fundamentals Training” hamutuk na’in 24. Aleinde ne’e, Prezidente CI konvida mós Prezidente Autoridade RAEOA atu partisipa iha atividade komemorasaun tinan dahuluk loron nasionál liberdade imprensa, 16 outubru 2023 ne’ebé sei hala’o iha Munisípiu Bobonaru, Postu Administrativu Balibo.
Prezidente RAEOA, Arsenio Paixão Bano hato’o agradese wa’in ba Prezidente CI ho komitiva tanba bele vizita no hala’o enkontru kortezia ho estrutura RAEOA. Aleinde ne’e, Prezidente RAEOA mós kompromete atu partisipa iha atividade komemorasaun loron nasional Liberdade imprensa ba dahuluk ne’ebé sei realiza iha munisípiu Bobonaro, postu Administrativu Balibo
Ikus liu, Prezidente RAEOA sente kontente no hato’o agradese wa’in ba CI no ABC-ID ne’ebé bele konsidera no deside atu realiza formasaun ba jornalista sira iha enklave Oecusse. (CI)