Dili, 01/08/2023 - Conselho de Imprensa de Timor-Leste (CI) hala’o audiénsia ho Sekretária Estadu Komunikasaun Sosiál (SEKOMS), iha sala enkontru SEKOMS, Palasiu Governu, tersa-feira, 01 agostu 2023.
Iha audiénsia ne’e, Conselho de Imprensa relata asuntu tolu importante ba SEKOMS, primeiru, aujente membru Conselho de Imprensa na’in ida ne’ebé to’o ohin loron seidauk hetan substituisaun, segundu, aprejenta mós kona-ba kuadru legal balun ne’ebé presiza atu halo alterasaun nomós lei balun ne’ebé seidauk iha hodi kompleta di’ak liutan serbisu Conselho de Imprensa nian.
Terseiru, Conselho de Imprensa informa ba SEKOMS kona-ba atividade anuál Dili Dialogue Forum ne’ebé sei realiza iha loron 1 setembru 2023. Atividade DDF ne’e, Sekretáriu Estadu Komunikasaun Sosiál mós sai hanesan oradór xave nomos sei ensera atividade refere.
Iha enkontru ne’e, Conselho de Imprensa liuhusi Konselleiru Francisco Belo Simões da Costa husu ba Sekretáriu Estadu Komunikasaun Sosiál atu enkoraja membru Governu sira bainhira hasoru konflitu ruma kona-ba produtu jornalístiku, labele lori kazu ba Ministériu Públiku maibé utiliza de’it direitu resposta no retifikasaun.
Alein de ne’e, Konselleiru Francisco husu mós ba membru governu sira atu utilizasaun lei komunikasaun sosiál bainhira hasoru disputa ruma hasoru jornalista ka órgaun no meiu komunikasaun sosiál, liuhusi dalan mediasaun ne’ebé tuir lei, Conselho de Imprensa mak lidera prosesu mediasaun ne’e rasik.
Partisipa iha iha enkontru ne’e, Sekretáriu Estadu Komunikasaun Sosiál, Expedito Loro Dias Ximenes, Konselleiru Francisco Belo Simões da Costa, Diretór Ezekutivu Interinu, Antonio Dias, Diretór Relasaun Institusional no Informasaun, Altino da Cruz Freitas, Asesór sira SEKOMS nian hanesan Pedro Brinca, Zaulino Gomes no Noemio Falcão. (CI)