Baucau - Durante loron rua nia laran (26-27/07/2023), Prezidente Conselho de Imprensa de Timor-Leste (CI), Otelio Otefasilita treinamentu Faze daruak ho Tema: “Hakbi’it Rádiu Lokál Ne’ebé Kualidade Iha Parte Jestaun Rekursu No Oinsá Halo Advokasia Ba Jornalista Rádiu Lokál Sira”, ne’ebé organiza husi Fundação Pátria, iha Munisípiu Baucau.
Fundação Pátria koopera ho Plan International Timor-Leste (PITL) hodi realiza atividade formasaun ne’e nu’udar parte intergrada husi programa empoderamentu ba media, espesialmente ba radiu Komunidade sira, ne’ebé hala’o iha Kuarta ho Kinta (26-27 Jullu 2023), iha Munisípiu Baucau.
Objetivu husi atividade ne’e atu hakbi’it abilidade rádiu Komunidade sira Atu hasa’e koñesmentu di’ak liu tan husi rádiu Komunidade sira iha parte rekursu umanu, oinsá mak aktores rádiu lokál sira bele iha kapasidade ba jestaun lideransa nian liuhusi halo jestaun rekursu umanu ne’ebé diak tebes.
oinsá bele buka fundus ba rádiu Komunidade rasik hanesan bele halo proposta ba finanseiru no mós jestaun ba iha informasaun komersiál sira husi Parte Governu inklui ajénsia lokál, nasionál no internasionál liuhusi kria programa rádiu ne’ebé sustentanvel, edukativu no informativu haree liu ba asuntu polítika, Ekonomia, saude, edukasaun, sosiál no kulturál.
Formasaun durante loron rua nia laran, Prezidente Conselho de Imprensa foka liu ba matéria oinsá mobiliza rekursu hodi haforsa rádiu komunidade sira nomós oinsá atu halo advokasia ba rádiu komunidade sira.
Iha formasaun ne’e mós prezidente esplika kona-ba jornalízmu investigasaun nian liu-liu oinsá halibur notísia, halo investigasaun kle’an, no produs notísia ho kualidade, nomós matéria seluk ida ne’ebé Prezidente lori mak rezolusaun konflitu no jestaun ba emosaun nian.
Atividade formasaun sei hala’o ba aktores rádiu Komunidade sira hotu iha territoriu nasionál liuhusi agrupamentu rejional hanesan Dili , Atauro, Aileu, RAEOA , iha Munisipiu Ainaro mak sei inklui Same/Manufahi, Suai/Covalima, ho Ainaro rasik. Nune’e mos ba Munisipiu Liquiça inklui Ermera, Maliana ho Liquiça rasik. (CI)