Díli – Conselho de Imprensa de Timor-Leste (CI), liuhusi Diretór Ezekutivu Interinu, Antonio Dias, kuarta-feira, 26 jullu 2023, simu audiésia ho estrutura organizasaun jornalista Uniaun Profisaun Jornalista Timor-Leste (UPJTL).
Iha Audiénsia ne’ebé hala’o iha sala plenária Conselho de Imprensa, Prezidente UPJTL, Horácio Babo entrega dokumentu legal sira organizasaun UPJTL nian ba Diretór Ezekutivu Interinu, Antonio Dias.
“Ne’e ba dahuluk asosiasaun jornalista ida lori nia dokumentus sira mai hatama ba Conselho de Imprensa, entaun agradese ba ne’e ida ne’e,” Diretór Ezekutivu Interinu, Antonio Dias hato’o kestaun ne’e bainhira hetan entrevista ho Rádiu Televizaun Timor-Leste, Empreza Públika (RTTL, EP), iha Conselho de Imprensa, Kuarta-feira, 26 jullu 2023.
Tuir prosedimentu normal, parte ezekutivu Conselho de Imprensa sei submete dokumentu hirak ne’e ba plenáriaiha loron sesta-feira, 28 jullu 2023, hodi bele hetan apresiasaun nomos delibera ba publika iha Jornal Repúblika.
Haktuir iha lei komunikasaun sosiál artigu 44 kona-ba kompetesnia sira Conselho de Imprensa nian, iha Alinea j, dehan apoia organizasaun jornalista sira nian ba-iha dezenvolvimentu kompetensia profisionál, téknika no intelektuál jornalista sira nian.
Organizasaun Jornalista nu’udar klibur ba jornalista sira no profisionál komunikasaun sosiál nian. Conselho de Imprensa de Timor-Leste deve ser fasilita apoiu finanseira no asisténsia téknika ba sira hodi hametin kapasidade institusionál, fortalese abilidade advokasia, nomós dezenvolve kompeténsia téknika, profisionál, no intelektuál jornalista sira mak hamahan-an iha ne’eba. Entidade ida ne’e mós konsidera nu’udar elementu estratéjiku ida hodi halo estudu ne’ebé mak relasiona ho servisu Jornalístika. (CI)