Dili – Kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Conselho de Imprensa mak fó no renova.
Asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.
Nune’e, Conselho de Imprensa de Timor-Leste (CI) kontinua fasilita Estajiu Karteira Profesionál (EKP) ba estajiáriu karteira profesional ba faze daruak hamutuk na’in 19 husi mídia nasionál hanesan, RTTL, EP, TATOLI.IP, Gardamor, Independente, Naunil media no Timor-Post.
Iha abertura ne’ebé hala’o iha salaun enkontru Conselho de Imprensa, segunda-feira, 24 jullu 2023, Prezidente Conselho de Imprensa, Otelio Ote hatete karteira professional hatuur tiha ona iha lei komunikasaun sosiál nune’e fó kompeténsia ba Conselho de Imprensa atu organiza.
“Karteira Profesinal ne’e atu legaliza de’it ita nia ejistensia nu’udar jornalista professional. Tanba ne’e, karteira professional importante tebes iha ita nia kareira professional iha mundu jornalizmu. Jornalista se de’it tenke tuir prosesu atu bele hetan karteira professional, tuir lei komunikasaun sosiál haruka,” haktuir Prezidente Conselho de Imprensa, Otelio Ote.
Matéria ba formasaun “Kolókiu Públiku” loron dahuluk maka Kode ÉtikaJornalízmu, Elementu 10 Jornalízmu no Matadadalan Utilizasaun Mídia Sosiál ba Públiku no Jornalízmu.
Kolókiu públiku nia objetivu mak atu hasa’e nivel konheseimentu jornalista sira nian iha área espesializada sira nune’e bele hala’o kna’ar jornalízmu ho di’ak liutan. Ita rekoñese katak Kualidade jornalízmu iha Timor-Leste seidauk to’o nível ida aas liu. (CI)