Dili, 17/07/2023 – Conselho de Imprensa de Timor-Leste (CI), apresia Nota Komunikasaun Sosiál husi Ministériu Públiku ba kazu notifikasaun Prokuradoria Jerál Repúblika ne’ebé notifika Jornalista no Xefe Redasaun online Hatutan.com.
Conselho de Imprensa apresia ho vontade di’ak Konsellu Superiór Ministériu Públiku nian ne’ebé hasai nota resposta no retifikasaun ba públikasaun online Hatutan.com nian.
“Conselho de Imprensa apresia desizaun husi konsellu superior Ministériu Públiku. Tanba ida ne’e duni maka prosedur ne’ebé presiza halo tuir, tanba tuir lei komunikasaun sosiál, asuntu saída de’it ne’ebé mosu tanba rezultadu serbisu husi jornalista, ita tenke resolve tuir prosesu jornalístiku nian,” Prezidente Conselho de Imprensa, Otelio Ote hato’o apresiasaun ne’e liuhusi konferénsia imprensa ne’ebé hala’o iha salaun enkontru, CI, Quintal Boot, Dili, 17 Jullu 2023.
Conselho de Imprensa konsidera Ministériu Públiku hatudu ezemplu di’ak ida. CI hein katak instituisaun Governu no privadu ka sosiedade sivíl sira, inklui mídia rasik bele banati tuir saída maka Ministériu Públiku hatudu ona.
Aktu Ministériu Públiku nian konsidera nu’udar inisiativa ida di’ak hodi kontribui ba hametin no haburas liberdade imprensa no liberdade espresaun iha Timor-Leste.
Iha loron 17 Jullu 2023, Conselho de Imprensa kompostu husi Prezidente Otelio Ote, Konselleiru Benevides Barros Correia no konselleiru Francisco Simões Belo da Costa hato’o apresiasaun CI nian kona-ba Nota Komunikasaun Sosiál husi Ministériu Públiku liuhusi konferénsia imprensa.
Alein de ne’e, Conselho de Imprensa de Timor-Leste, hato’o apresiasaun kona-ba Nota Komunikasaun Sosiál husi Ministériu Públiku liuhusi Karta escrita ofisiál ida hodi diriji ba Ministériu Públiku. (CI)