Dili, 26/06/2023 – Conselho de Imprensa de Timor-Leste (CI) realiza “Media Literacy Training” ba reprezentante estudante sekundária 27 ne’ebé lokaliza iha kapitál Dili, iha salaun Golden Star, Adian, Dili.
Estudante sekundáriu hamutuk na’in 27 mak hola parte iha formasaun ne’e ho objetivu atu “Muda Adolexente Sira Nia Maneira Haree Mídia ba Aproveita no Obserba”.
Iha abertura, Prezidente Conselho de Imprensa de Timor-Leste (CI), Otelio Ote haktuir formasaun ne’ebé Conselho de Imprensa fasilita estudante sira hodi bele eleva koñesimentu estudante sira nian kona-ba era dijital ne’ebé iha influénsia boot iha mundu ohin loron.
Otelio Ote husu atu estudante sira aproveita ho didi’ak treinamentu ne’e, “espera katak Liuhusi treinamentu literasia dijital ida ne’e, karik alin sira balun iha intensaun hakarak sai jornalista”.
Iha fatin hanesan, Diretór Ezekutivu Interinu, Antonio Dias haktuir Conselho de Imprensa iha nesesidade duni atu realiza treinamentu ida ne’e bele forma sensu ne’ebé krítiku ba estudante sira hodi bele hola disizaun bainhira utiliza plataforma dijitál sira.
Antonio Dias espera katak formasaun loron rua, fasilita husi formadór sira ne’ebé iha esperiénsia iha área espesializada sira bele tulun estudante sira hodi bele eleva sira nia koñesimentu.
Conselho de Imprensa nu’udar entidade administrativa independente no hala’o ninia atribuisaun no konpeténsia ne’ebé la submete ba diresaun ka orientasaun sira husi podér polítiku nian.Conselho de Imprensa hari’i ho baze Lei Komunikasaun Sosiál, nú. 5/2014 no Dekretu lei nú. 25/2015 loron 5 fulan Agostu, kona-ba kriasaun Conselho de Imprensa no aprova nia estatutu. Conselho de Imprensa hari’i iha loron 10, maiu 2016, iha loron ne’ebé membru konsellu na’in lima simu tomada de posse husi Parlamentu Nasionál.(CI)