Glenu – Conselho de Imprensa de Timor-Leste (CI), liuhusi Diresaun Apoiu Jurídiku no Supervizaun (DAJUS), hala’o sosializasaun lei Komunikasaun sosiál ba estudante eskola Sekundáriu Jerál Nino Konis Santana Gleno, Ermera.
Atividade Sosializasaun ne’e hala’o iha loron kinta-feira, 22 juñu 2023, iha eskola sekundária jerál Nino Konis Santana, Glenu, Ermera, ho objetivu atu partilla informasaun ba estudante sira kona-ba papél Conselho de Imprensa nian inklui mós konteudu husi lei komunikasaun sosiál nian.
Nune’e estudante sira bele kompriende di’ak kona-ba lala’ok serbisu Conselho de Imprensa nian nomós papél órgaun no meiu komunikasaun sosiál inklui knaar jornalista sira nian.
Iha abertura, Konselleiru Amito Araujo hatete, Sosializasaun ne’e importante tebes ba alin estudante sira atu bele hatene serbisu jornalista nian ne’ebé nu’udar fonte informasaun ba públiku.
Amito enkoraja alin estudante sira bainhira remata iha ensinu sekundáriu atu bele hili profisaun jornalista nian hodi bele kontribui ba hametin demokrasia iha ita rain liuhusi informasaun.
Diretór eskola Sekundáriu Jerál, Nino Konis Santana, Clementino Madeira Hato’o agradese wa’in ba Conselho de Imprensa tanba bele partilla ona informasaun sira nia estudante terseiru segundu, nune’e sira bele iha mós koñesimentu naton kona-ba área komunikasaun sosiál iha Timor-Leste.
Partisipa iha atividade sosializasaun ne’e, estudante terseiru segundu, hamutuk na’in 100 nomós profesór sira. Tuir planu, Conselho de Imprensa sei hala’o mós atividade hanesan ba eskola sekundáriu tolu husi munisípiu tolu iha Timor-Leste.
Conselho de Imprensa de Timor-Leste (CI) nu’udar entidade administrativa independente no hala’o ninia atribuisaun no kompeténsia ne’ebé la submete ba diresaun ka orientasaun sira husi podér polítiku nian. Conselho de Imprensa hari’i ho baze Lei Komunikasaun Sosiál, nú. 5/2014 no Dekretu lei nú. 25/2015 loron 5 fulan Agostu, kona-ba kriasaun Conselho de Imprensa no aprova nia estatutu. Conselho de Imprensa hari’i iha loron 10, maiu 2016, iha loron ne’ebé membru konsellu na’in lima simu tomada de posse husi Parlamentu Nasionál. (CI)