Membru Conselho de Imprensa de Timor-Leste, Konselleiru Amito Araujo apresia ho semináriu ne’ebé Autoridade Nasionál Petroliu no Minerais – ANPM ofrese ba jornalista no editor sira tanba atu eleba partisipantes sira ninia kapasidade hodi fo sai informasaun iha sektor petroliu no minerais nune publiku bele kompriende didiak ANPM ninia knar.
“Conselho de Imprensa kuntinua fo apoiu ba entidade hotu-hotu suporta nafatin liu-liu ANMP ne’e, tanba kontiudu ka linguasaun ne’ebé fo sai iha mídia ne’e barak liu mak linguasaun petroliu ninian ne’ebé dala barak sociadade la kompriende”, Konselleiru Amito Araujo hato’o lia ne’e iha abertura seminariu ba jornalista no editor textu husi Mídia Nasionál, iha Edefisiu Torre de Controlu, Airoportu Suai, Munisipiu Covalima, quarta-feira (22/03/2023).
Konselleiru CI ne’e afirma, Conselho de Imprensa sei koopera no apoiu programa hirak ne’ebé ANPM hala’o, hodi hasae kapasidade jornalista no editor sira, nune bele ofrese informasaun ba publiku ho qualidade.
Nia mos apela ba partisipantes sira atu aproveita oportunidade ne’e hodi aprende no kompriende didiak materia ne’ebé parte tekniku ANPM apresenta.
Iha oportunidade ne’e, Prezidente Autoridade Petrolio no Minerais – ANPM, Florentino Soares Pereira esplika katak, seminar ne’e atu hasae partisipantes sira nia koñesimentu no kapasidade kona-ba lalaok setor petroleu no minerais liu-liu termus tekniku iha área petroleu no minerais.
“Objetivu ita nia programa ida ne’e, atu bele fahe ba ita boot sira industria ida ne’e nia lalaok, ita koalia kona-ba industria ita boot sira hotu hatene ne’e hare kona-ba petroliu no minerais”, hateten Florentino Soares Pereira.
Atividade ne’e partisipa hosi jornalista no editor textu hamutuk ema nain 18 kompostu husi jornalista no editor hosi RTTL,EP, STL, Timor Post, Independente, Agensia Tatoli, Online Hatutan.com, Radio Komunidade, RTM no seluk tan.
Seminariu ne’e hala’o hahu iha tersa to’o sexta – feira (21-24/2023) ho atividade hanesan introdusaun knar AMP kompostu husi diresaun pesquica no lisitasaun, diresaun desenvolvimentu no produsaun, diresaun saude, seguransa no ambiente inklui ajenda sira seluk tan.(CI)