Presidente Conselho de Imprensa, Otélio Ote ho nia delegasaun halo inkontru kortejia ho Komisi Penyiarang Indonesia (KPI) hodi koalia kona-ba posibilidade kooperasaun ne’ebé halo entre Conselho de Imprensa ho KPI, iha Jakarta, Indonesia, Tersa-feira (22/03/2023).
Fokus diskusaun ne’e relasaun ho kompentensia Conselho de Imprensa nian ne’ebé Lei Radiodifuzaun atribui ba halo supervizaun ba radio no televizaun iha futuru. Konkluzaun husi inkontru ne’e entre parte rua aseita atu estabelese akordu iha area radiodifuzaun ninian.
Liuhusi inkontru ne’e mos delegasaun Conselho de Imprensa aprezenta objetivu vizita Conselho de Imprensa nian mai Jakarta, ba Ketua KPI liuliu relasaun ho programa formasaun ba Media Monitoring no Matadalan ba Ezame Kompentensia iha Lembaga Pers Doktor Sutomo -LPDS.
Delegasaun Conselho de Imprensa nian kompostu husi Presidente Conselho de Imprensa, Otélio Ote, Konselleiru Benevides Barros, Konselleiru Francisco Belo, Diretor Ezekutivu, Rigoberto Monteiro no Teknika Administrasaun Finansas, Liliosa Amaral.