Díli – Conselho de Imprensa de Timor-Leste (CI) serbisu hamutuk ho ABC International Development (ABC-ID) fasilita treinamentu ba Jornalista, Xefe Redasaun, Diretór Mídia no reprezentante Asosiasaun Jornalista nomós Jestór Rádiu Komunidade sira kona-ba kobertura eleisaun parlamentar 2023.
Treinamentu ne’e hala’o iha salaun City 8, Manleuana, Dili, kinta-feira, 13 abril 2023, partispa husi Diretór Mídia, Jornalista, Xefe Redasaun, Asosiaun Jornalista sira, Jestór Rádiu Komunidade husi munisípiu 13 hamutuk na’in 60.
Objetivu husi programa ne’e maka oinsá bele hasa’e koñesimentu jornalista sira nian kona-ba reportájen iha eleisaun hodi hasoru festa demokrasia iha kampaña eleitorál ne’ebé sei hahú iha loron 19 abril to’o 18 maiu 2023.
Aleinde ne’e, oinsá maka jornalista sira bele apoiu ba kombate HOAX ka lia falsu liuhusi kobertura no reportájen sira iha prosesu kampaña no eleisaun parlamentares tinan 2023.
Oradór ba Atividade loron tomak ne’e maka hanesan Fiona Churchman no Aaron Kierney husi ABC International Development ko’alia kona-ba “Balance, Independence, Interviews Finding and Topics to Covers”.
Iha mós aprezentasaun rua husi entidade eleitorál hanesan CNE no STAE. Entretantu, parte Conselho de Imprensa aprezenta mós materia ida kona-ba “Matadalan Reportájen Eleitorál” husi Diretór Diresaun Análize no Dezenvolvimentu Mídia (DADM), Alberico da Costa Junior.
Iha abertuda, Diretór Ezekutivu, Rigoberto Monteiro hato’o agradese wa’in ba ABC International Development tanba bele suporta ona Conselho de Imprensa iha área kapasitasaun ba jornalista sira.
Conselho de Imprensa hein katak kooperasaun ne’e sei kontinua iha future oin mai iha área dezenvolvimentu seitór komunikasaun sosiál iha Timor-Leste inklui mós dezenvolvimentu instituisionál Conselho de Imprensa rasik.
Iha fatin hanesan, Director of Engagement & Programme of ABC International Development Strategy, Aaron Kearney hatete “ABC-ID orgullu tebes bele parseria ho Conselho de Imprensa hodi fó oportunidade ida ne’e atu apoiu ita boot sira iha eleisaun oin mai”. (CI)