Díli – Prezidente Conselho de Imprensa de Timor-Leste (CI), Otelio Ote no Konselleiru Amito Araujo, simu tomada de posse husi Prezidente Parlamentu Nasional (PN), ba restante mandatu tinan 2023-2025.
Serimónia tomada de posse hala’o iha salaun konferénsia Parlamentu Nasional, kinta-feira, 23 fevereiru 2023. Atividade ne’e prezide husi Prezidente Parlamentu Nasional, Aniceto Longuinhos Guterres Lopes.
Iha diskursu, Prezidente Conselho de Imprensa, Otelio Ote kompromete iha nia lideransa durante restante mandatu iha Conselho de Imprensa sei hametin no haburas tan kooperasaun ho sidadaun hotu, instituisaun sira, sosiedade sivil no órgaun no meiu komunikasaun social sira hodi promove Liberdade imprensa no Liberdade espresaun iha Timor-Leste.
“Conselho de Imprensa sei la hamrik mesak, promove Liberdade imprensa no Liberdade opiniaun liuhusi planu estratéjiku, planu asaun anuál sira,” esplika prezidente CI, Otelio Ote.
Prezidente Sesante Conselho de Imprensa, Virgílio da Silva Guterres hato’o pedidu rezignasaun hosi kargu Prezidente no Membru Conselho de Imprensa, iha loron 19 Dezembru 2022.
Iha loron 27 Janeiru 2023, Conselho Imprensa realiza konferénsia ba Asosiasaun Jornalista Timor Lorosa’e (AJTL), iha salaun Delta Nova, Comoro, Dili, eleze Amito Araújo hodi substitui reprezenta jornalista sira.
Entretantu iha loron 7 fevereiru 2023, liuhusi plenária extraordináriu, sala plenária, CI, Quintal Boot, membru CI na’in lima (5), eleze restante mandatu ba Konselleiru Otelio Ote hodi lidera órgaun reguladora ne’e durante períodu tinan 2023-2025.
Partisipa iha serimónia ne’e, Membru Parlamentu Nasional, Ministru Asuntu Parlamentares no Komunikasaun Sosiál, Konselleiru sira, Diretór Ezekutivu CI, familia emposadu no jornalista sira. (CI)