Dili – Conselho de Imprensa de Timor-Leste (CI) realiza workshop ida ba jornalista no mídia kona-ba Reportájen Balansu iha Ámbitu Eleisaun no Kampaña Polítika nomos evita Propaganda Polítika.
Atividade ne’e hala’o iha salaun Delta Nova, Comoro, Dili, sesta-feira, 10 marsu 2023, partisipa husi xefe redasaun, editor no jornalista beat polítika husi mídia nasionál hamutuk na’in 50.
Objetivu husi workshop ne’e maka oinsá bele hametin kompetensia jornalista sira nian iha ámbitu eleisaun hodi Evita publika notisia sira ne’ebé ho nia kontiudu provokativu, akuzativu no propaganda polítiku.
Sensibilizasaun durante loron tomak ne’e, iha oradór na’in tolu maka hato’o materia ligadu ba Matadalan Reportájen Eleitoral ba Jornalista no Mídia. Primeiru, Xefe Gabinete Prezidente CNE, Evangelino de Jesus Fátima ko’alia kona-ba Regras no Prosedimentu Kampanña Eleitoral.
Segundu, Diretór Departamentu formasaun STAE, Carceres Ximenes, ko’alia kona-ba Prosesu Eleisaun Parlamentar ba Sidadaun sira, terseiru maka Diretór Análize Dezenvolvimentu Mídia, Alberico da Costa Juniro ko’alia kona-ba Eleisaun no Papel Mídia iha Timor-Leste. Prátika Komun iha Reportájen Eleisaun, Saida Maka Lealdade iha Mundu Jornalízmu no Erru Komun iha Kobertura.
Antes ne’e Conselho de Imprensa serbisu hamutuk ho Ajénsia Internasionál Programa Nasoens Unidas ba Dezenvolvimentu (PNUD/UNDP) Core-TL Project produz manual Matadalan Reportájen Eleitorál ba Jornalista no Mídia. Matadalan ida ne’e nu’udar pontu inisiu ida ne’ebé konsidera hanesan refénsia di’ak ba jornalilsta no mídia sira nia kna’ar professional.
Matadalan ne’e sai nu’udar fonte ba jornalista ida dame no kria pas iha sosiedade Timor-Leste iha kontestu kobertura no publikasaun notísia no programa sira iha ámbitu eleisaun nian.
Matadalan ne’e mós atu ajuda jornalista no mídia sira hodi mantein balansu, imparsialidade no objetividade iha kobertura no publikasaun notisia no programa sira hodi la hetan intervensaun ruma, tantu intervensaun polítika ka ekonomia. (CI)