DILI, 15/03/2023 - Conselho de Imprensa de Timor-Leste (CI) liuhusi Diresaun Apoiu Jurídiku no Supervizaun (DAJUS) CI, Sosializa Lei Komunikasaun Sosiál (KOMSOS), Direitu Resposta no Retifikasaun inklui Direitu Antena ba Partidu Polítiku sira, relasiona ho Kampaña no Eleisaun Parlamentar iha tempu besik.
Tuir Atribuisaun iha Artigu 44 Lei Komunikasaun Sosiál; Conselho de Imprensa (CI) iha kompeténsia ida mak promove Dialogu entre operadór sira Komunikasaun Sosiál, Sosiedade no Orgaun sira Estadu nian, atu idak idak bele halo kna’ar ho di’ak no respeita nafatin direitu sira ne’ebé hetan protesaun husi Lei no Kontribuisaun.
Nune’e ho mandatu ida ne’e, Conselho de Imprensa de Timor-Leste (CI) tuir Lei Nu. 5/2014, halo Sosializasaun Lei Komunikasaun Sosiál (KOMSOS), nomós direitu Resposta no Direitu Antena ba Partidu Polítiku sira.
Tambá ne’e, liu husi Sosializasaun Lei KOMSOS ne’e, Prezidente Conselho de Imprensa de Timor-Leste (CI), Otelio Ote, hamutuk ho Konselleiru, Espedito Loro Dias Ximenes, no Konselleiru Benevides Correia Barros, esplika liu polítika kona-ba Papel Importante ne’ebé durante ne’e Conselho de Imprensa iha hodi ejiste atu tau matan ba Órgaun Meius Komunikasaun sira no Jornalista sira iha Timor laran tomak.
“Se Imi la dun gosta ka imi nia publikasaun ruma relasaun ho imi nia Publikasaun iha Meius Komunikasaun ruma hanesan Televizaun ka Radiu, Online, ka Jornal ruma, imi bele keisa mai iha Conselho de Impresa ou imi bele Protesta direita ba Meius Komunikasaun ne’ebe hatun imi nia informasaun ne’e,” dehan Prezidente Ote.
Alem de ne’e Equipa Tekniku Conselho de Imprensa nian mos esplika kona-ba kontiudu espisifiku lei komunikasaun sosiál no mekanismu Parpol hetan Direitu ba Resposta no Retifikasaun, Direitu Antena no aplikasaun koime wainhira Mídia sira publika sala informasaun no seluk tan.
Iha oportunidade ne’e, representante Partidu Politiku sira, rekomenda atu CI rekomenda ba Governu hodi kria dekretu Governu tuir lei Komsos, hodi fo poder ba CI atu aplika koima ba mídia ne’ebé halo infrasaun kontra kodigu Étika, Kontrola publikasaun iha Mídia sosiál nomos rekomendasaun sira seluk.
Reprezentante Relasaun Publika hosi Partidu Politiku sira ne’ebe marka prezensa iha sorumutuk ne’e mak hanesan, PLP, Partidu Republikanu, Partidu Os Verdes, Partidu Khunto, no Partidu PST. (CI)