Dili, 14/03/2023 - Conselho de Imprensa de Timor-Leste (CI) ho Centro Nacional Chega (CNC) sei atualiza hikas nota entendimentu entre instituisaun rua, ne’ebé remata ona iha loron 20 fulan Desembru tinan 2022.
Asuntu ne’e sai nu’udar tópiku prinsipál iha enkontru entre Diretór Ezekutivu CI, Rigoberto Monteiro, akompaña hosi Diretór Diresaun Relasaun Institusionál no Informasaun (DRII), Altino da Cruz Freitas no parte legál husi Diresaun Apoiu Jurídiku no Supervizaun (DAJUS) CI, Octavia Pereira ho Diretór Divizaun Relasaun External Komunikasaun no Advokasia-CNC, Gaudencio S. Souza ho nia ekipa, iha salaun plenária CI, Quintal Boot, Dili, tersa-feira (14/03/2023).
Iha diskusaun ne’e parte sira ko’alia kona-ba konteudu nota kooperasaun foun entre instituisaun rua ne’ebé sei asina iha tinan 2023 ne’e mak hanesan, planu ba produs Matadalan kobertura Jornalízmu ba asuntu direitus umanus nomós matadalan kobertura Journalízmu ba paz inklui ho nia modul formasaun.
Alem de ne’e, intituisaun rua mós sei kuntinua servisu hamutuk hodi monitoriza no oferese prémiu direitus umanus ba jornalista sira, hari Monumentu Liberdade no News Museum inklui asuntu relevante seluk.
Akordu hirak ne’e sei konkretiza atividade sira liu husi alokasaun orsamentu tuir planu asaun anuál hosi Conselho de Imprensa de Timor-Leste (CI) ho Centro Nacional Chega (CNC) nune’e bele responde ba vizaun no misaun kada instituisaun.
Tuir planu akordu foun ne’e sei asina iha ámbitu komemorasaun loron mundiál Liberdade Imprensa, 3 de Maiu 2023, iha Timor-Leste.
Iha loron 19 Dezembru tinan 2019, CI no CNC asina nota entendimentu ho objetivu atu desemina relatoriu Chega liu husi publikasaun mídia ne’ebé refleta ba pás no direitus umanus no relatoriu Chega, atribui premiu direitus umanus ba jornalista inklui promove pás, liberdade espresaun no Liberdade Imprensa. (CI)