Díli, 07 Janeiru 2023 – Plenária extraordináriu Conselho de Imprensa de Timor-Leste (CI), tersa-feira, ho ajenda eleisaun ba Prezidente Conselho de Imprensa ba restante mandatu tinan 2023-2025.
Liuhusi eleisaun iha sala plenária, CI, Quintal Boot, membru CI na’in lima (5), eleje restante mandatu ba Konselleiru Otelio Ote hodi lidera órgaun reguladora ne’e durante períodu tinan 2023-2025.
Hafoin eleitu, liuhusi konferénsia imprensa, Diretór Ezekutivu, Rigoberto Monteiro hamutuk ho prezidente eleitu no membru na’in 4 anúnsia kedas rezultadu votasaun ne’e ba públiku.
“Ohin, iha plenária extraordinariu ho prezensa membru na’in lima, sira hili tiha ona prezidente difinitivu ba períodu 2023 até 2025. Sira na’in lima hili malu tuir estatutu Conselho de Imprensa artigu 23, eleje Konselleiru Otelio Ote hanesan Prezidente Conselho de Imprensa definitive,” esplika Diretór Ezekutivu, Rigoberto Monteiro.
Diretór Ezekutivu hanesan sekretariadu Conselho de Imprensa nian, sei haruka naran Prezidente Definitivu no membru foun Conselho de Imprensa ne’ebé foin eleje husi jornalista sira ba Parlamentu Nasional hodi hetan tomada de posse.
Iha diskursu, Prezidente Definitivu, Otelio Ote kompromete atu “kontinua luta hodi atinji Liberdade imprensa no Liberdade espresaun nomós oinsá hametin ita nia profesaun iha terenu liuhusi hametin kode étika jornalista”.
Prezidente eleitu mós sei halo konsolidasaun interna hodi buka hatene buat barak liutan iha CI. Aleide ne’e, sei konsolida instisaun mídia hodi buka hatene mídia sira nia kondisaun no performa.
Prezidente eleitu mós esforsu maka’as hodi armoniza partisipasaun mídia, editor no jornalista sira iha planu sira ne’ebé Conselho de Imprensa trasa tiha ona.
Prezidente Sesante Conselho de Imprensa, Virgílio da Silva Guterres hato’o pedidu rezignasaun husi kargu Prezidente no Membru Conselho de Imprensa, iha loron 19 Dezembru 2022.
Nune’e, iha loron 27 janeiru 2023, Conselho de Imprensa realiza konferénsia ba Asosiasaun Jornalista Timor Lorosa’e (AJTL), iha salaun Delta Nova, Comoro, Dili, eleje Amito Araujo hodi substitui Virgílio da Silva Guterres. (CI)