Díli – Conselho de Imprensa de Timor-Leste (CI) realiza konferénsia ba Asosiasaun Jornalista Timor Lorosa’e (AJTL) hodi hili membru konselleiru foun ba restante mandatu tinan 2023-2025.
Konferénsia ne’e hala’o iha salaun Delta Nova, Comoro, Dili, hetan partisipasaun husi membru AJTL nomós observadores sira, inklui mós prezidente interinu, membru konselleiru, Diretór Ezekutivu, Diretores no funsionáriu balun husi Conselho de Imprensa.
Durante konferénsia, partesipantes aprezenta Kandidatu na’in rua maka hanesan Jornalista Lírio Fonseca no Amito Araujo.
Rezultadu husi votasaun hatudu, Amito Araujo ho votu 66, Lirio Fonseca ho votu 38, no votu nulu 1, ho total votantes hamutuk 105. Nune’e, konferensista sira eleje Jornalista Amito Araujo hodi bele substitui hikas reprezentante jornalista, Virgílio da Silva Guterres iha Conselho de Imprensa.
Prezidente Sesante Conselho de Imprensa, Virgílio da Silva Guterres hato’o pedidu rezignasaun husi kargu Prezidente no Membru Conselho de Imprensa, iha loron 19 Dezembru 2022. Ho nune’e, liuhusi konferénsia refere, AJTL bele numeia hikas reprezentante jornalista ida hodi substitui hikas durante restante mandatu.
Fó hanoin fali katak, iha loron 4 Jullu 2022, CI no AJTL realiza konferénsia hili reprezentante jornalista husi AJTL, Virgílio da Silva Guterres hodi ba tuur iha Conselho de Imprensa nu’udar Membru ba segundu mandatu 2021 – 2025, iha salaun konferénsia Delta Nova.
Iha loron 25 Janeiru 2022, Virgílio da Silva Guterres, re-eleitu ba mandatu daruak nu’udar Prezidente CI, períodu 2021-2025 liuhusi eleisaun sekretu, no iha loron 10 Fevereiru 2022, prezidente no membru CI hetan tomada pose husi Prezidente Parlamentu Nasional.
Konsellu Imprensa nu’udar entidade administrativa independente no hala’o ninia atribuisaun no konpeténsia ne’ebé la submete ba diresaun ka orientasaun sira husi podér polítiku nian.
Konsellu Imprensa kompostu hosi membru sira na’in lima, ne’ebé hili hanesan tuirmai, reprezentante na’in rua ne’ebé hili husi jornalista sira rasik, liuhosi eleisaun; reprezentante ida husi órgaun komunikasaun sosiál; sidadaun na’in rua, matenek no iha esperiénsia profesionál ne’ebé kle’an liuliu kona-ba komunikasaun sosiál, husi sira na’in rua ne’e ida jurista, ne’ebé hatudu hosi Parlamentu Nasionál. (CI)