Díli – Prezidente Sesante Conselho de Imprensa de Timor-Leste (CI), Virgílio da Silva Guterres hato’o pedidu rezignasaun husi kargu Prezidente no Membru Conselho de Imprensa, iha loron 19 Dezembru 2022.
Pedidu rezignasaun ne’e hato’o tanba iha loron 12 Dezembru 2022, Parlamentu Nasionál eleje Virgílio da Silva Guterres nu’udar Provedor dos Direitos Humanos e Justiça ba períodu tinan 2023-2027.
“Ohin, 19 Dezembru 2022, liuhusi surat ida ne’e, ha’u husu rezignasaun husi kargu prezidente Conselho de Imprensa. Pozisaun ne’ebé ha’u simu hosi plenáriu nobre Conselho de Imprensa iha tinan 2021,” haktuir Virgílio Guterres iha karta rezignasaun ne’ebé deriji ba plenáriu Conselho de Imprensa, iha loron 19 Dezembru 2022.
Nune’e, iha Enkontru plenariu extraordináriu 20 dezembru 2022, delibera rezignasaun Prezidente Sesante, Virgílio da Silva Guterres husi kargu prezidente no membru Conselho de Imprensa.
Iha loron hanesan, liuhusi Plenariu extraordináriu nomeia hikas konselleiru Francisco Simões Belo da Costa hodi asumi interinamente nu’udar prezidente Conselho de Imprensa durante loron 90 hodi hein prosesu eleisaun ba membru CI foun husi reprezentante jornalista nian.
Hafoin delibera tiha pedidu reziganasaun Virgílio da Silva Guterres husi kargu Prezidente no Membru Conselho de Imprensa, Conselho de Imprensa hala’o kedan konferénsia imprensa ida loron 20 Dezembru 2022, hodi anunsia ba públiku kona-ba rezignasaun Virgílio da Silva Guterres no nomeasaun prezidente interinu.
Prezidente Interinu hatete hato’o agradese ba prezidente sesante no membru konselleiru sira ne’ebé fó fiar ba Konselleiru Francisco Simões Belo da Costa hodi lidera interinamentu órgaun reguladora komunikasaun sosiál ne’e rasik.
“Agradese ba prezidente sesante nia esperitu voluntarizmu durante hamutuk iha Conselho de Imprensa, dedikasaun tomak ne’ebé prezidente sesante halo ba Conselho de Imprensa hodi hala’o kna’ar ida ho firme no vijibliza instituisaun Conselho de Imprensa entermus de rai laran nomos iha rai liur,” Prezidente Interinu hato’o kestaun ne’e liuhusi konferénsia imprensa.
Loron 20 Dezembru 2022, nu’udar loron ikus ba Virgílio da Silva Guterres iha Conselho de Imprensa. Membru Conselho de Imprensa na’in lima (5) hanesan Virgílio da Silva Guterres, Benevides Correia Barros, Expedito Dias Ximenes, Francisco Simões Belo da Costa no Otelio Ote, simu pose iha loron 10 Fevereiru 2021, iha uma fukun Parlamentu Nasionál ba mandatu daruak períodu tinan 2021-2025.
kabe ba ejekusaun orsamentu 2022 nian ne'ebé taka ona iha meadu fulan Dezembru 2022, maka Conselho de Imprensa seidauk bele organiza konferénsia ida ba jornalista sira hodi nomeia hikas sira nia reprezentante. tuir planu, sei hala'o konferénsia hili membru Konsellu foun iha tinan 2023. (CI)