Railaco – Conselho de Imprensa de Timor-Leste (CI), hala’o Retiru Anuál tinan 2022 iha Munisípiu Ermera, Postu Administrativu Railaco, durante loron rua, 15-16 Dezembru 2022.
Objetivu husi retiru anuál ne’e maka atu halo evaluasaun ba progresu no dezafiu sira ezekusaun Planu Asaun Anuál (PAA)Conselho de Imprensa nian durante tinan 2022. Objetivu seluk maka liuhusi retiru anuál ne’e bele mellora di’ak liutan serbisu Conselho de Imprensa nian iha tinan 2023.
Iha abertura, Konselleiru Expedito Loro Dias Ximenes hatete “Ita halo fali avaluasaun ba saída maka ita halo ona no sei halo iha tinan oin. Ita ko’alia mós kona-ba avansus, obstakulus no dezafiu sira nune’e bele hadi’a iha serbisu CI nian iha futuru.”
Evaluasaun ne’e mós atu hare oinsá bele hala’o kontinuasaun ba obra sira ne’ebé iha ona dezde hahú husi tinan 2016 to’o 2022.
Iha loron dahuluk, hala’o avaliasaun ba serbisu kada diresaun hanesan Diresaun Rejistu no Apoiu Jurídiku (DRAJ), Diresaun Dezenvolvmentu Análize Media (DADM), Diresaun Komunikasaun Sosiál, Relasaun Institusionál no Kooperasaun (DCSRIC), Diresaun Administrasaun Finansas, Aprovizionamentu no Lojístika (DAFAL), Diresaun Rekursu Umanu (DRH).
Iha loron daruak, aprezentasaun planu 2023 ho mekanizmu implementasaun, avaliasaun Fiskál Úniku kona-ba Ezekusaun Orsamentu Anuál, avaliasaun Diretór Ezekutivu kona-ba rezultadu relatóriu diagnóstika ba Conselho de Imprensa, avaliasaun husi Prezidente no Membru sira nian no ikus liu maka reflesaun no enseramentu.
Partisipa iha retiru anuál maka Prezidente no membru na’in haat, Fiskál Úniku, Diretór Ezekutivu, Diretores Diresaun nomós funsionáriu sira Conselho de Imprensa nian.
Conselho de Imprensa estabelese iha tinan 2016, iha loron 10 fulan Maiu, iha loron ne’ebé membru na’in lima toma pose husi Parlamentu Nasional. Konsellu Imprensa nu’udar entidade administrativa independente no hala’o ninia atribuisaun no konpeténsia ne’ebé la submete ba diresaun ka orientasaun sira husi podér polítiku nian. (CI)