Díli – Conselho de Imprensa de Timor-Leste (CI) no Ajênsia Internasionál Programa Nasoens Unidas ba Dezenvolvimentu (PNUD/UNDP), hala’o sosializasaun Matadalan Reportájen ba Jornalista no Mídia.
Atividade sosializasaun ne’e hala’o iha salaun Restaurante Golden Star, Audian, Díli, durante loron rua, 01-02 Dezembru 2022, partisipa husi Xefe redasaun, Editór no Joinalista mídia nasional, Jestór no jornalista rádiu komunidade sira, hamutuk ema na’in 38, feto 9 no mane 29.
Iha abertura, Diretór Ezekutivu, Rigoberto Monteiro hatete Conselho de Imprensa produs matadalan ida ne’e atu bele guia jornalista sira oinsá bele halo balansu iha kobertura no hakerek notísia sira nune’e ita nia publiku ne’ebé lee notisia bele tetu.
Sosializasaun ne’e mós importante ba jestór no jonalista sira rádiu komunidade tanba funsaun rádiu komunidade nian importante tebes hodi transmite informasaun ba públiku sira ne’ebé iha liu área rural.
Matadalan ida ne’e refleta indikadór importante rua hanesan kontribui ba implementasaun lei komunikasaun sosiál iha Timor-Leste no kontribui ba implementasaun Conselho de Imprensa nia planu estratéjiku ba tinan lima (2022-2025).
Matadalan ne’e deskreve asuntu tolu mais importante, Primeiru, kontestu eleisaun no papel mídia iha Timor-Leste, Segundu, relasaun mídia ho entidade sira hanesan STAE, CNE, Votantes, Partidus Polítikus, Figura Polítika no komunidade sira, Terseiru ne’ebé importante liu maka kode étika reportájen ninian.
Conselho de Imprensa Serbisu hamutuk ho UNDP liuhusi parseria ba projetu Eleisaun Reziliente Covid (CORE-TL) ne’ebé finansia husi Governu Japaun maka dezenvolve no produs matadalan Reportájen Eleitorál ba Jornalista no Mídia. (CI)