Díli – Conselho de Imprensa de Timor-Leste (CI) no Ajénsia Internasionál Programa Nasoens Unidas ba Dezenvolvimentu (PNUD/UNDP) realiza Lansamentu Matadalan Reportajen Eleitorál ba Jornalista no Mídia, iha Hotel Novo Turismo, Dili, Tersa-feira (22/11/2022).
Matadalan ida-ne’e hanesan referénsia ba jornalista no mídia sira atu halo sira nia kna’ar ho profisionál no sai nu’udar fonte ba jornalista ida dame no kria pás iha sosiedade Timor-Leste.
Iha intervensaun, Diretór Ezekutivu CI, Rigoberto Monteiro hatete matadalan ida ne’e refleta indikadór importante rua hanesan kontribui ba implementasaun lei komunikasaun sosiál iha Timor-Leste no kontribui ba implementasaun Conselho de Imprensa nia planu estratéjiku ba tinan lima (2022-2025).
Matadalan ne’e deskreve asuntu tolu mais importante, Primeiru, kontestu eleisaun no papel mídia iha Timor-Leste, Segundu, relasaun mídia ho entidade sira hanesan STAE, CNE, Votantes, Partidus Polítikus, Figura Polítika no komunidade sira, Terseiru ne’ebé importante liu maka kode étika reportájen ninian.
Lori Conselho de Imprensa nia naran, Diretór Ezekutivu, Rigoberto Monteiro hato’o agradese wa’in ba UNDP liuhusi projetu Eleisaun Reziliente Covid (CORE-TL) ne’ebé bele serbisu hamutuk ho CI hodi dezenvolve matadalan reportájen eleitoral ba jornalista no mídia iha Timor-Leste.
Hato’o mós agradese wa’in ba Governu no Povu Japaun ne’ebé apoiu finanseiru ba dezenvolvimentu matadalan reportájen eleitoral ba jornalista no mídia iha Timor-Leste.
Deputy Resident Representative of UNDP, Adeline Carrier dehan UNDP no Conselho de Imprensa hanesan parseiru ida liuhusi projetu Eleisaun Reziliente Covid (CORE-TL) ne’ebé finansia husi Governu Japaun.
Trird Secretary to The Embassy of Japan in Timor-Leste, Daishin Sasaki espera katak jornalista no meiu komunikasaun sosiál sira sei kumpri matadalan ne’e, tantu jornalista no mídia tradisional no mídia modernu.
Atividade ne’e partisipa husi Embaisadora Japaun iha Timor-Leste, Reprezentante UNDP, Jestor Radiu Komunidade, Diretor no Midia nain, STAE, Representante UNTL no UNITAL inklui Jornalista sira. (CI)