Díli – Conselho de Imprensa de Timor-Leste (CI) realiza ezame karteira profesional tinan 2022 ba jornalista hamutuk na’in 20, kuarta-feira, 23 Novembru 2022, iha salaun enkontru CI, Quintal Boot, Díli.
Haktuir iha lei komunikasaun sosiál artigu 14, alinia primeiru hatete kondisaun atu hala’o profisaun jornalista nian mak abilitasaun ho ninia títulu rasik, hanaran karteira profesionál, ne’ebé Conselho de Imprensa mak fó no renova.
Nune’e mós iha artigu 14, haktuir kona-ba asesu ba profisaun jornalista nian hahú hosi estájiu obrigatóriu ida, no remataho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.
Iha artigu 16 lei komunikasaun sosiál kona-ba Estájiu Profesionál, iha alínea 6 hatete Estájiu remata ho ezame ida ne’ebé Konsellu Imprensa mak fó, no iha ne’ebá estajiáriu tenke hatudu koñesimentu sira kona-ba étika profisionál, direitu no devér sira jornalista nian, funsaun no devér hirak komunikasaun sosiál nian, Estadu ninia funsaun iha setór komunikasaun sosiál no kestaun relevante hirak seluk rejime jurídiku nian kona-ba atividade jornalístiku.
Diretór Ezekutivu, Rigoberto Monteiro dehan ezame korteira professional hodi hare kona-ba estajiáriu sira nia kompeténsia profesional. Nia hatutan, bainhira jornalista sira kaer ona karteira professional ne’e hatudu sira nia profesionalidade iha área komunikasaun sosial.
Ezame karteira profesional ba estajiáriu sira hala’o durante loron tolu, hahú husi 23-25 Novembru 2022. Ezame fahe ba faze rua hanesan ezame eskrita no oral. Jornalista estajiáriu na’in-20 mai husi mídia sira hanesan RTTL, E.P, GMN-TV, STL Media Group, Diáriu INDEPENDENTE, Rádiu Komunidade Comoro. (CI)