Díli, 14/11/2022 – Conselho de Imprensa de Timor-Leste (CI), serbisu hamutuk ho United Nations Educational, Scientific and Cultural Organizastion (UNESCO) hodi realiza Forum Editoriál, iha loron Segunda-feira, iha salaun Restaurante Golden Star, Audian.
Iha abertura, Prezidente Conselho de Imprensa hatete importante tebes atu eziste Aliansa Kombate Dez-Informasaun iha Timor-Leste tanba ita tama ona iha era dijital entaun plataforma informasaun ne’e muda oioin ona.
“Conselho de Imprensa foti pontu importante ida ne’e bazeia ba diskusaun sira ne’ebé kolega jornalista sira barak mós halo kona-ba nesesidade atu hamosu aliansa kombate dez-informasaun,” Esplika Prezidente CI.
Lori Conselho de Imprensa nia naran, Prezidente Virgílio Guterres hato’o agradese wa’in ba UNESCO ne’ebé apoiu ona CI ba realiza Forum Editoriál. Hato’o mós agradese wa’in ba Jornalista, Xefe Redasaun sira ne’ebé partisipa iha atividade refere.
Enkontru forum editorial realiza ho tema “Dezenvolvimentu Aliansa Kombate Dez-informasaun iha Timor-Leste”, partisipa husi Xefe Redasaun, Editór, Jornalista sira hamutuk na’in 30.
Iha atividade ne’e, Prezidente Conselho de Imprensa, Virgílio da Silva Guterres maka hala’o abertura. Entretantu, Reprezentante UNESCO, Yekthi Hesthi Murthi, ko’alia kona-ba Kna’ar UNESCO ba kombate des-informasaun iha Timor-Leste.
Reprezentante UNESCO, Yekthi Hesthi Murthi hatete UNESCO hakarak fó apoiu ba Timor-Leste tanba hakarak dezenvolvimentu demokrasia Timor-Leste nian bele la’o ho di’ak no bele garante mós seguransa jornalista sira nian.
Hesthi hatete imponsível ba ema ida bele hala’o fact checking mesak, presiza serbisu ho ema barak ne’ebé iha abilidade oioin nune’e bele kombate Dez-Informasaun ne’e rasik nomós bele ajuda komunidade sira atu oinsá bele indentifika informasaun ida ne’ebé loos no informasaun ne’ebé falsu.
Nia dehan Timor-Leste nia infra-estrutura internet sei la’o neneik, ne’e oportunidade ba Timor atu bele prepara-án antes internet nia velosidade as ka la’o lais liutan.
Kordenadór Ekipa Cek Fakta Indonesia, Adi Marsiela mós fahe esperiénsia kona-ba Importánsia ba ezisténsia Aliasa ba Kombate Dez-Informasaun. (CI)