Balibo – Conselho de Imprensa de Timor-Leste (CI), hamutuk ho entidade Estadu RDTL, Asosiasaun Jornalista, Resposável Ógaun no Meiu Komunikasaun Sosiál, Jornalista sira, Parseiru Estratéjiku (UNESCO no AGH), Autoridade Lokal Balibo, estudante no komunidade Balibo, halibur hamutuk iha Balibo, iha loron 16 Outubru 2022 hodi Lansa Loron Nasional Liberdade Imprensa.
Iha dalan ne’ebé naruk, jornalista sira hala’o ona sira nia kna’ar husi tinan 1974 to’o 2022, sakrifika terus no esforsu naruk, maibé jornalista sira hala’o ona sira nia kna’ar hodi kontribui ba prosesu tomak luta libertasaun nasional, iha prosesu hari demokrasia no iha prosesu dezenvolvimentu nasionál.
Jornalista nia kontribuisaun la boot, maibé jornalista mak arkiva ema nia istória liuhusi nia tinta, filmajen no fotografia. Jornalista nia kontribuisaun la hanesan udan ida ne’ebé habokon rai. Jornalista hanesan mahowen ida ne’ebé turuk iha aitahan leten maibé nia kontinua fó fresku,”
“Obrigadu ba Estadu RDTL ne’ebé fó rekoñesimentu as tebes ba mídia no jornalista ba sira nia kontribuisaun ba promove liberdade imprensa no liberdade espresaun iha Timor-Leste,” dehan Diretór Ezekutivu.
Iha ámbitu komemorasaun loron Mundia Liberdade Imprensa, 3 Maiu 2022, iha parlamentu nasionál, Conselho de Imprensa aprezenta proposta ba parlamentu nasionál kona-ba loron nasionál Liberdade Imprensa.
Iha loron 24 Maiu 2022, Parlamentu Nasionál liuhusi plenária aprova ho votus afavor 49, kontra 0 no abstensaun 0 ba projetu rezolusaun Parlamentu Nasionál hodi institui loron 16 Outubru kada tinan hanesan loron nasionál ba liberdade imprensa.
Kada tinan, Conselho de Imprensa ho entidade estadu seluk hamutuk ho parseiru sira sei komemora loropn nasionál liberdade imprensa. (CI)