Díli, 16/08/2022 – Jornalista na’in lima (5), kompostu husi Eugenio Pereira (SMNews), João Antonio (SMNews), Julio de Jesus (RTTL,EP), Arménio dos Santos (Gardamor TV), Julião de Andrade (RaKom Aileu), entrega hikas ona Karteira Profesional ba Conselho de Imprensa Timor-Leste (CI), iha salaun enkontru CI, Quintal Boot, Díli, iha loron segunda no tersa feira, 15-16 Agostu 2022.
Jornalista na’in lima ne’e entrega hikas karteira professional hafoin hetan notifikasaun husi Conselho de Imprensa tanba sira husik ona kna’ar jornalista hodi ba hala’o servisu hanesan ofisiál relasaun públika iha Palásiu Prezidensial, Aitarak-Laran, Díli.
Jornalista sira entrega Karteira professional no simu direta husi Prezidente Conselho de Imprensa, Virgílio da Silva Guterres nomós Diretór DADM, Alberico da Costa Junior no akompaña husi Diretór Ezekutivu, Rigoberto Monteiro.
Haktuir iha lei Komunikasaun Sosiál, artigu 13 kona-ba Hala’o Profisaun, iha alinea 1 hatete Kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé KonselluImprensa mak fó no renova.
Lei Komunikasaun sosiál, artigu 17 kona-ba Inkompatibilade sira, iha alínea 1 dehan Profisaun jornalista nian labele hala’o hamutuk ho funsaun hirak tuir mai; Funsionáriu públiku; Kaer kargu ruma iha órgaun soberania ida, iha órgaun podér lokál sira ka iha lideransa komunitária; Dirije partidu polítiku; Relasaun públika ka asesór imprensa, komunikasaun no imajen; Kualkér atividade ida ne’ebé atu promove bens no servisu sira hanesan publisidade.
Entretantu, iha artigu 17, alínea 3 haktuir Bainhira hala’o funsaun hirak ne’ebé hakerek ona iha númeru 1, ema profisionál ne’e tenke fó fila fali títulu identifikasaun nian ne’e, ba iha Konsellu Imprensa, nune’e nia labele hala’o atividade jornalístiku. (CI)