Díli, 28/07/2022 – Conselho de Imprensa de Timor-Leste (CI), realiza forum editoriál ba dalima hamutuk ho Diretór Mídia, Xefe Redasaun, Diretór informasaun sira, Editór, Koordenadór Kobertura no Jornalista Seniór sira iha salaun restaurante Golden Star, Audian, Díli.
Forum editorial dalima ne’e, Conselho de Imprensa liuhusi Diresaun Análize Dezenvolvimentu Media (DADM), aprezenta kona-ba rezultadu monitorizasaun produtu jornalístiku relasiona ho eleisaun prezidensiál primeira no segundu ronde ne’ebé akontese iha tinan 2022.
Iha biban ne’e, Conselho de Imprensa mós aprezenta ba komunidade mídia sira kona-ba planu CI nian ba realizasaun Dili Dialogue Forum, ne’ebé tuir planu sei hala’o iha fulan Agostu tinan ne’e.
Conselho de Imprensa ho komunidade mídia sira ko’alia mós kona-ba lansamentu dahuluk loron nasionál Liberdade imprensa ne’ebé monu iha loron 16 Outubru no sei hala’o iha Munisípiu Bobonaro, Postu Administrativu Balibo.
Haktuir iha Planu Asaun Anuál Conselho de Imprensa nian, iha mós atividade ida ho naran forum editorial ho nia parseiru serbisu sira hanesan mídia na’in, Asosiasaun Jornalista, Xefe Redasaun, Editór, responsável Órgaun no Meiu Komunikasaun Sosiál sira.
Forum editorial nu’udar meiu ida hodi diskuti asuntu sira ne’ebé liga ho mídia. Alein de ne’e, Conselho de Imprensa mós aprezenta ninia rezultadu monitorizasaun relasiona ho infrasaun kódigu étika nomós asuntu prinsipál sira seluk ne’ebé liga ho kna’ar jornalista no mídia. (CI)