Oecusse, 15/07/2022 - Conselho de Imprensa de Timor-Leste (CI), nia kompetensia atu halo Sosializasaun kona-ba Kna’ar Conselho de Imprensa nomós Direitu de Resposta no Retifikasaun ba Jornalista no Entidade sira iha Ministériu no Instituisaun Governu sira iha RAEOA.
Iha abertura ne’e, Prezidente Conselho de Imprensa de Timor-Leste (CI), Virgílio da Silva Guterres hatete Conselho de Imprensa nia parte lakohi atu lei Komunikasaun Sosiál ne’e atu monu hanesan lei sira seluk, ho ida ne’e sira hakarak la’o ba munisípiu hotu-hotu inklui mós iha RAEOA atu fahe konteudu husi Lei ne’e.
“Ami la’o dala hira ona uluk mai ona ba Autoridade PNTL, nomós autodidade sira seluk, no ohin ami mai atu ba parte ida ne’ebé importante loos”, dehan Prezidente iha nia Abertura ba Sosializasaun ne’e.
Kna’ar Conselho de Imprensa maka atu garante públiku liu-liu sidadaun sira ne’ebé lee notísia, rona rádiu, hare televizaun atu hetan informasaun ne’ebé loloos no momos. “Informasaun sira ne’ebé orgaun komunikasaun sira fo sai ne’e bazeia ba faktus bazeia ba realidade laos bazeia ba Jornalista nia opiniaun pesoal”, Prezidente CI afirma.
Prezidente Autoridade RAEOA no ZEESM, Arsénio Paixão Bano, hafoin abertura Sosializasaun ne’e, husu ba instituisaun sira hotu atu partisipa ho másimu ba sosializasaun ne’ebé hala’o husi Conselho de Imprensa hodi esplika kona-ba Kna’ar Conselho de Imprensa nomós Direitu de Resposta no Retifikasaun ne’e.
“Ha’u hanoin Conselho de Imprensa fó oportunidade ita atu aprende kona-ba Kna’ar Conselho de Imprensa nomós Direitu de Resposta no Retifikasaun ne’e”, dehan nia.
Alein de Sosializasaun, Conselho de Imprensa hala’o mós sosilizasaun liuhusi meiu komunikasaun sosiál “Radio Talk” iha radiu komunidade Oecussi. Conselho de Imprensa atribui mós karteira profesionál ba jornalista radiu komunidade na’in 5, jornalista destakadu RTTL,EP no Tatoli.IP hamutuk na’in 2. (CI)