Díli – Conselho de Imprensa de Timor-Leste (CI), hala’o sosializasaun lei komunikasaun sosiál “Direitu Resposta no Retifikasaun” ba sosiedade sivil.
Atividade sosializasaun hala’o iha loron kuarta-feira (28/06/2022), iha salaun Golden Star, Audian, Díli. Objetivu husi sosializasaun ne’e maka ofisiál sosiedade sivil sira bele komprende didi’ak kontestu lei komunikasaun sosiál “direitu resposta no retifikasaun” ne’e rasik.
“Mana no maun sira ne’ebé mai reprezenta nia organizasaun, ami hein katak hotu ida ne’e, bele entende no komprende saída maka direitu resposta no saída maka direitu retifikasaun,” Prezidente CI, Virgílio da Silva Guterres hato’o kestaun ne’e iha abertura sosializasaun lei komsos.
Prezidente CI esplika, ema ruma ne’ebé sente prejudikadu ba produtu jornalíztiku ruma, iha direitu atu hatan. “Tamba ne’e, Conselho de Imprensa hanoin katak entendimentu kona-ba direitu resposta ne’e importante. La’ós de’it hanesan organizasaun maibé hanesan mós pesoál,” tenik Prezidente CI.
Haktuir iha lei komunikasaun sosiál, kapítulu V, iha artigu 34 kona-ba direitu resposta no retifikasaun, garante ba ema hotu atu utiliza direitu ne’e bainhira iha publikasaun ruma liuhusi meiu komunikasaun sosiál ne’ebé maka kontra ona prinsípiu direitu privasidade naran di’ak, reputasaun, segredu estadu no segredu justísa.
Partisipa iha atividade sosializasaun ne’e hamutuk ema na’in 20, hanesan FONTIL, FOKUPERS, Luta Hamutuk, ADTL, Belun, FUNDEF, HAFOTI, Pradet, RHTO, Caritas Australia, Empreza Di’ak, Fundasaun Alola, ALFELA, JSMP, MHVF, Plan Internasionál. (CI)