Díli – Conselho de Imprensa de Timor-Leste (CI), hala’o sosializasaun “Direitu Resposta no Retifikasaun” ba entidade administrasaun direta no indireta estadu nian, tersa-feira (28/06/2022), iha salaun Golden Star, Audian, Díli.
Objetivu husi sosializasaun ne’e maka ofisiál relasaun públika husi entidade estadu direta no indireta atu komprende didi’ak kontestu direitu retifikasaun no direitu resposta ne’e rasik.
Iha abertura, Diretór Ezekutivu, Rigoberto Monteiro enkoraza ofisiál relasaun públika sira atu entende didi’ak funsaun serbisu relasaun públika iha kontestu komunikasaun sosiál nian.
“Media officer nia serbisu loron-loron tenke halo monitorizasaun ba produtu jornalístiku sira ne’ebé hakerek kona-ba ita nia entidade no hakerek kona-ba ita nia superior.”
“Ami nia funsoens atu sensibiliza ita boot sira atu komprende didi’ak kontestu direitu resposta no reifikasaun atu nune’e, ita boot sira nia irarkia halo deklarasaun polítika ruma ka aprezenta progresu serbisu ministériu nian ba mídia bainhira iha faillansu, ita boot sira uja direitu resposta no retifikasaun atu resposta,” Diretór Rigoberto Monteiro hatete.
Haktuir iha lei komunikasaun sosiál, kapítulu V, iha artigu 34 kona-ba direitu resposta no retifikasaun, garante ba ema hotu atu utiliza direitu ne’e bainhira iha publikasaun ruma liuhusi meiu komunikasaun sosiál ne’ebé maka kontra ona prinsípiu direitu privasidade naran di’ak, reputasaun, segredu estadu no segredu justísa.
Partisipa iha atividade sosializasaun ne’e hamutuk ema na’in 22, Husi entidade administrasaun direta no indireta maka hanesan PGR, SEAK, IADE, TIC Timor, INCT, ANE. IP, FDCH, CLN, TradeInvest Timor-Leste, SEP, MCAE. (CI)