Bobonaro - Diretór Ezekutivu Conselho de Imprensa de Timor-Leste (CI), Rigoberto Monteiro akompaña ho Diretór Komunikasaun Sosiál, Relasaun Institusionál no Kooperasaun, Altino da Cruz Freitas ho ekipa tékniku CI hala’o enkontru ho Prezidente Autoridade Munisípiu Bobonaro, Ernesto Barreto de Oliveira, iha edefísiu Prezidente Autoridade Munisipiu Bobonaro, Quinta-feira (23/06/2022).
Enkontru ne’e hodi ko’alia kona-ba planu preparasaun lansamentu dahuluk komemorasaun loron Nasionál Liberdade Imprensa 16 Outubru, ne’ebé tuir planu sei realiza ho atividade oioin durante semana ida iha postu Administrativu Balibo, Munisípiu Bobonaro.
Iha sorumutu ne’e, CI koordena ho Autoridade Munisípiu Bobonaro atu aloka orsamentu hodi rehabilita monumentu (sem naran) iha rotunda sentru Postu Administrativu Balibo nomós hadi’a palku ne’ebé babain uza ba serimónia iha kampu futebal Balibo.
Hafoin enkontru ne’e remata, delegasaun CI kuntinua enkontru ho Administradór Postu Administrativu Balibo, Procopio Caeiro ho Reprezentante Komunidade, hodi koalia kona-ba asuntu hanesan inklui ho planu enkontru preparasaun tuir mai, hodi realiza lansamentu loron nasional Liberdade Imprensa.
Iha inísiu tinan 2000, Asosiasaun Jornalista Timor-Leste ho jornalista seniór sira diskuti no aprezenta proposta ba Governu atu transforma trajedia Balibo ne’ebé rejulta jornalista internasionál na’in 5 mate iha loron 16 fulan Outubru tinan 1975, iha postu Administrativu Balibo, Munisípiu Bobonaro, nu’udar loron nasionál Liberdade Imprensa.
Tanba seidauk iha rejultadu iha tinan 2019 Conselho de Imprensa de Timor-Leste, hamutuk ho Asosiasaun Jornalista, Jornalista seniór, Mídia na’in, Diretór Mídia no Xefi Redaksaun kontinua esforsu no halo diskusaun hodi deside loron 16 fulan Outubru nu’udar loron nasionál Liberdade Imprensa.
Proposta loron nasionál ne’e entrega hosi Prezidente Conselho de Imprensa de Timor-Leste, Virgílio da Silva Guterres, ba Prezidente Parlamentu Nasionál, Aniceto Longuinho Guterres Lopes, iha ámbitu komemorasaun loron mundiál Liberdade Imprensa, iha Parlamentu Nasionál, tersa-feira (03/05/2022).
Hafoin iha loron 24 fulan Maiu Parlamentu Nasionál aprova hodi transforma loron 16 fulan Outubru nu’udar loron Nasional ba Liberdade Imprensa iha Timor-Leste. (CI)