Díli – Conselho de Imprensa de Timor-Leste (CI) hala’o sosializasaun matadalan jornalista kona-ba violénsia bazeia ba jéneru ba jornalista no jestór sira rádiu komunidade iha Timor laran tomak.
Atividade sosializasaun ne’e, hala’o iha salaun Golden Star, Audian, Díli, iha loron sesta no sábadu, 24-25 Juñu 2022.
Iha abertura, prezidente Conselho de Imprensa hatete asuntu violénsia bazeia ba jéneru ne’e sai hanesan asuntu ida ne’ebé delikadu katak ema barak hatene maibé uituan maka hakarak ko’alia.
Nia hatutan matadalan ne’e nu’udar guia ida ba jornalista sira hodi halo kobertura ne’ebé sensivel ba jéneru, hodi hafanu públiku nia konxiénsia kona-ba asuntu sosiál sira hanesan violénsia bazeia ba jéneru.
“Conselho de Imprensa sente iha nesesidade tebtebes atu fahe ho maluk jornalista sira hotu nomós ba hirak ne’ebé serbisu iha rádiu komunidade, liuliu ba jestór sira kona-ba manual ida ne’ebé foin dadauk Conselho de Imprensa fó sai,” Prezidente CI, Virgílio da Silva Guterres hatete.
Projetu dezenvolve matadalan reportájen violénsia bazeia ba jéneru ne’e realiza tanba serbisu hamutuk entre Conselho de Imprensa, UNDP liuhusi projetu Inisiativa Spotlight no hetan apoiu fundus husi Uniaun Europeia.
Rádiu komunidade sira ne’ebé partisipa iha formasaun ne’e hamutuk 15 ho totál partisipantes hamutuk ema na’in 26.