Díli, 22/06/2022 – Conselho de Imprensa de Timor-Leste (CI), hala’o sosializasaun matadalan jornalista kona-ba Reportájen Violénsia Bazeia ba Jéneru, ba jornalista, editór no xefe redasaun sira, iha salaun Golden Star, Audian, Díli.
Prezidente CI, Virgílio da Silva Guterres hateten Conselho de Imprensa kontinua Sosializa manual matadalan jornalista kona-ba Reportájen Violénsia Bazeia ba Jéneru ba mídia hotu atu bele komprende liutan kontestu saída mak Violénsia no saída mak Jéneru.
“Ita hanesan jornalista ita nia papel no kna’ar iha sosiedade ne’e maka saída? Ita hanoin buat ne’ebé maka ita ba foti faktus husi fontes hodi publika maibé ita la interese problema jéneru. Maibé ita hare didi’ak istória jornalízmu ninia responsabilidade sosiál ne’ebé tradisional uluk ninia ne’e atu sai lian ba ema lian laek,” hateten husi prezidente CI.
Matadalan ne’e nu’udar guia ida ba jornalista sira hodi halo kobertura ne’ebé sensivel ba jéneru, hodi hafanu públiku nia konxiénsia kona-ba asuntu sosiál sira hanesan violénsia bazeia ba jéneru.
Projetu dezenvolve matadalan reportájen violénsia bazeia ba jéneru ne’e realiza tanba serbisu hamutuk entre Conselho de Imprensa, UNDP liuhusi projetu Inisiativa Spotlight no hetan apoiu fundus husi Uniaun Europeia.
Sosializasaun ne’e sei hala’o durante loron rua, hahú husi loron 22-23 Juñu 2022. Tuir planu sei halo mós sosializasaun ba jestór no jornalista rádiu komunidade hotu iha Timor laran tomak.
Conselho de Imprensa de Timor-Leste (CI) koopera ho Ajénsia Internasionál Programa Nasoens Unidas ba Dezenvolvimentu (PNUD/UNDP) Timor-Leste liuhusi “Spotlight Initiative Project ba elimina violénsia kontra feto no labarik feto,” konsege Produz ona “Matadalan ba Jornalista: Reportajen Violénsia Bazeia ba Jéneru”.
Partisipa iha atividade sosializasaun matadalan jornalista kona-ba Reportájen Violénsia Bazeia ba Jéneru maka hanesan jornalista, editór no xefe redasaun hamutuk na’in 30 husi media Nasional. (CI)